Presentada de Antonandria cras a merie sàbadu 1° de trèulas in Santu Basile de Monte (CA). A sas 18.00 in sos locales de s'asilu betzu Anna Cristina Serra e Gonario Sedda ant a faeddare de su libru de Pàulu Pillonca de reghente presentadu in Casteddu puru. Sos temas chi sunt prus istimados dae su Pillonca iscritore e òmine ddue sunt totus: s'identidade crara de sos sardos de sas biddigheddas de sa Sardigna interna, s'òdiu pro sas malifatias de sa giustitzia, s'amore ispirituale e sensuale, su sentidu de apartènnere a una comunidade antiga, s'amore pro sa limba comente ànima de un'identidade sarda chi est minimandesi e riscat de no àere tempus benidore. 

Sa trama de su romanzu movet dae sa morte de Sonazu, unu pastore de nomenada mala pro furas e isdorrobatòrios, chi enit imputada a s'innotzente Antonandria, chi est innamoradu de sa bella pitzinna Juanna Monne. Ischende de su sùddidu de su magistradu Frassu contras a issu, su giovanu si fuet e si che ghetat a bandidare. Dae custu si isboligat unu intritzu de abenturas e fados chi decretant su ustinu de su bandidu e de sa bidda intrea. Sa fine de su romanzu no est iscontada pro nudda e aberit un'istagione noa pro totu sa comunidade. 

Sa limba (de sèberu setentrionale) est manigiada cun s'arte e sa sapièntzia cun sas cales Pàulu nos at avesadu in custos annos. Est unu artisanu-artista Pillonca, gasi donosu e galanu, chi sa limba chi nd'arresurtat de su traballu suo paret naturale a beru mancari siat frutu de unu passientziosu e aficosu sedatzamentu e afinamentu fitianu. 

A sa presentada ddue at èssere s'autore.