Sa domo editora de Ceraxus Domus de Janas de Fabio Pillonca at publicadu un'àteru libru chi boddit is iscritos de Remundu Piras. Su volùmene "Sedas Lizeras" cuntenet is inèditos de su cantadore mannu de Biddanoa Monteleone chi galu no aiant connotu publicatzione peruna. In prus ddue at cantzones de is mèngius poetas de s'iscola de Biddanoa comente Bachis Fara, Anzelinu Pedrete, Bucianu Nieddu, Antoni Remundu, Peleu Casu, Antoni Simone Fois, Sarvadore Mortello, Bainzu Melone e Barore Riu. Su maistru de sos cantadores a bolu fiat naschidu su 29 de ladàmine de su 1905. A deghenoe annos fiat giai cantende in is palcos. Fiat abbarradu firmu, paris cun sos àteros cantadores, pro annos e annos pro more de sa proibitzione de is garas chèrfida dae sa Crèsia e su Fascimu. A pustis de sa segunda gherra mundiale benit a èssere unu de is cantadores prus famados in totu s'ìsula e lòmpet una carriera chi non tenet uguales finas a sa die de sa morte, su 21 de maju de su 1978. S'editoria sarda at intregadu a Piras diferentes volùmines: "Mistèriu", "Bonas Noas", "Sas Modas" e "A bolu". Ma sa poesia prus connota de Remundu Piras est su soneto "No sias isciau" chi est a sa segura, dae paritzos annos, unu paru de "manifestu" de su movimentu in favore a sa limba sarda.