Cursos regionales pro insignantes e dipendentes finantziados cun 700.000 èuros de sa Lege 482/99. Sa Regione sarda at a gastare prus de 700.000 èuros, finantziados in su 2002 cun sa lege istatale 482/99 pro sa tutela de sas minorias linguìsticas istòricas, pro organizare cursos de formatzione de limba e cultura sarda. Sos cursos, pro insignantes e dipendentes regionales ant a èssere fatos cun s'agiudu de is Universidades de Tàtari e de Casteddu, chi s'ant a incarrigare de s'organizatzione e de sa gestione de sos programmas didàticos. In s'assessoradu regionale de s'Istrutzione Pùblica in Casteddu, s'assessora Elisabetta Pilia e sa dirigente Antonina Iscanu ant atobiadu como carchi die, pro discùtere is lìnias-ghia de sos Cursos, su prèside de sa Facultade de Lìteras e Filosofia de Casteddu, Giùliu Paulis e su professore referente de su progetu, Maurizio Virdis, su referente de s'Universidade de Tàtari, Angelo Castellaccio, su diretore iscolàsticu regionale, Armando Pietrella e su presidente de s'Irre, Gabriele Uras, e tres rapresentantes de su Cussìgiu de Amministratzione de s'Istitutu.