Est andada bene meda sa presentada de eris domìniga de su libru de Micheli Ladu "S'àrvule de sos sardos" in Ollolai. In su programma de sa rassigna Pastores e Tenores s'organizatzione at detzisu de reservare su gazebo de sos atòbios totu su merie a unu dibatitu subra su libru de su iscritore ollolaesu. Presentes s'editore Frantziscu Cheratzu, Pepe Coròngiu (relatore) e su cuncordu de Benetuti e una bona parte de sa bidda. Cheratzu at nadu chi su romanzu est bendende bene mescamente in Casteddu e chi sa domo editora est cuntenta de àere fatu custu investimentu. Coròngiu at faeddadu a manera positiva de su su traballu de Micheli Ladu e at atzuntu chi <chie credet in sa limba e tenet capassidades a in antis o a pustis benit premiadu comente s'autore chi in un annu at bidu su libru publicadu e otentu unu incàrrigu de docèntzia a cuntratu in s'universidade>. Antonimaria Pala, collega iscritore torpeinu autore de "Addia", at resadu unu cantu de su contu inue benit prenetadu su benidore de sos sardos derruidos dae sos catalanos e custrintos pro sèmpere a "èssere su chi non semus". A sa fine gente in fila pro comporare su libru. Pagu ora in antis Micheli Ladu aiat presentadu a sos paesanos suos su libru de Pepe Coròngiu "Guvernare cun sa limba".