S'at a fàghere chenabura su 23 de làmpadas sa prima presentada ufitziale de su libru de Peppe Coròngiu "Guvernare cun sa limba". S'atòbiu est in programma a sas 18.00 in su Ex Ma (bia de Santu Lutzìferu) de Casteddu in una sala cun àghera cunditzionada. Ant a presentare s'òpera de s'iscritore lacunesu Umberto Cocco, capu de s'Ufìtziu Imprenta e Comunicatzione de sa Regione Sardigna e diretore de Su mundu Diplomàticu, e Anna Cristina Serra, poetissa, una de sas ànimas prus meledosas e verdaderas de su movimentu poèticu sardu. Ant a èssere presentes s'editore Frantziscu Cheratzu e s'autore. Organizat su Sòtziu Limba Sarda de su cale Coròngiu est presidente. Ateras presentadas sunt in calendàriu pro su 28 de su mese de làmpadas in S'Alighera in ocasione de un'atòbiu internatzionale cun rapresentantes de sas minorias europeas e pro s'8 de su mese de treulas in Làconi, bidda de nàschida de s'autore. Su libru est disponibile in is mèngius librerias de Sardigna.