S'at a fàghere ocannu puru in Rodez (Frantza) dae su 17 a su 22 de treulas s'editzione noa de sa "Estivada", su festival de sa minoria ocitana chi collit totu sas espressiones artìsticas de custa limba de minoria. Poesia, contos, literadura, cìnema, artes bàrias, iscultura, cantzones, mùsica e àteru pro cussas dies ant a agatare ospitalidade in una initziativa chi tenet comente punna cussa de presentare sa cultura e sa limba ocitana a su mundu. Naschida in su 1995, s'Estivada est oe in die una bella realtade chi amustrat sa creatzione ocitana in totu sas formas suas. Est unu atòbiu isetadu meda dae sos artistas e dae su pùblicu chi bi andat in nùmeru sèmpere prus mannu. In su 2005 belle 35.000 persones. S'Estivada 2006 renovat s'editzione in forma de biennale cun acordios fortes intre sas sete regiones mannas de su Sud frantzesu: Midi, Pirénées, Aquitaine, Limousin, Provence Alpes Cote d'Azur, Rhone Alpes, languedoc Rousillom e Auvergne. Sos ocitanos sunt presentes finas in Catalùnia in sa Badde de Aran e in Itàlia in sas baddes piemontesas. Ocannu sa Catalùnia at detzisu de agiudare a manera fativa s'organizatzione de s'Estivada.