Segundu unu sondàgiu publicadu oe dae su diàriu de Barcelona La Vanguardia, su eja a s'Istatutu in su referèndum at a balangiare su 75% e sa partetzipatzione at a èssere a prope de su 60%. Su giornale moderadu catalanu at bogadu a craru custos datos in s'isetu de una cunsultatzione chi in Catalùnia at a èssere de importu meda pro sa polìtica e sa sotziedade intrea. Su lider ispagnolu Zapatero at propostu a sos catalanos unu cumprumissu chi at fatu isciopare su guvernu de sa Generalitat e at fatu peorare sa gherra intre ERC, partidu republicanu e natzionalista estremista, e totu sos àteros partidos catalanistas. Su Partidu Popular, dae àtera banda, s'est decraradu contras a calesisiat reconnoschimentu de sa "naciò" catalana. Ma s'inchesta istatìstica diat dèpere pònnere in pedinu sos dirigentes de s'ERC, proite resurtat chi sa meidade de sos eletores de s'ERC at a votare pro s'Istatutu, mentres petzi su 30 % contras. Finas su 30 pro chentu de eletores de su PP paret chi s'ant a ischierare in favore de s'aprovatzione de s'Istatutu. Su partidu sotzialista de Pascal Maragall e Convergencia i Uniò de Arturo Mas, nde essint bene dae custu iscomprou.