Est essidu pro sa domo editora italiana Carocci s'ùrtimu libru de su saligheresu Antoni Arca retuladu "Alghero, città catalana d'Italia. La letteratura popolare a tutela delle lingue locali". Si tratat de una regorta de sàgios de argumentos bàrios chi aberint una fentana crìtica noa a subra de sa chistione de su catalanu in S'Alighera, su bilinguismu, sa poesia, sas relatas cun sa Catalùnia e sa literadura fabulistica e populare. Sa presentada est de su linguista e poeta Carles Duarte i Montserrat, diretore de sa fundatzione Carulla. Arca, chi insignat Literadura pro s'infàntzia e Limba e Literadura Catalana in s'universidade de Tàtari, amustrat una capassidade de analizu funguda e puntuda, ma chi resesset a ghiare su letore in una sèmida de istùdios chi destruturant a manera positiva avesos e datos de sa realidade saligheresa. A tretos Arca est finas intzitziligheri, ma lu faghet pro bogare a craru cuntraditziones e "tòpoi" comunes de sa chistione de su bilinguismu in sa tzitade de Rafael Sari, Antoni Ciuffo e Joan Palomba. Su libru (pag. 142, euros 15) tenet puntos meda de artu livellu e abistèntzia: s'antepòsitu, s'intrada, s'istòria, s'ode a su "poeta saligheresu ignotu". Unu volùmene de non pèrdere pro chie est interessadu a ischire de prus de sas chistiones catalanas in Sardigna.  

Peppe Coròngiu