Giai non si nde biet cada die, de pùbricu comente cussu chi sàpadu 13 mese de nadale at prenadu sa sala comunale de Lunamatrona pro sighire unu dibàtitu subra sa didàtica. Pro more de s’impignu de Caderina Pisanu, maistra aficosa pro sa limba, s’est fatu unu cumbènniu chi isperamus potzas serbire a semenare frutos profetosos in sas campuras illacanadas de su Campidanu ‘e Mesu. A s’atòbiu ant partetzipadu sas autoridades prus mannas de su territòriu: su presidente de sa provìntzia Fulvio Tocco, su consigeri regionale Gian Battista Orrù, su sìndigu de Lunamatrona Alessandro Merici, su dirigente de sas iscolas Arcangelo Cau, iscritores, poetas, maistros de totu cussa cussòrgia. 



Relatores subra sos temas inditados Mariella Marras, dirigente iscolastica e istudiosa de didàtica e Peppe Coròngiu, presidente de su Sòtziu Limba Sarda. Ant faeddadu totu custas persones e nd’est essidu – si pensat – unu arrejonu non teòricu o neulosu, ma unu determìniu pro progetare e sighire a fàghere pro su tempus benidore de sa limba. B’at leges como, e possibilidades chi agiudant iscolas e amministratziones chi cherent fàghere. Sas dificurtades non mancant e mancu unu paru de "tebidesa" de sa classe dirigente sarda pro custu problema. Ma s'ativismu de gente cumpetente e non interessosa podet fàghere meda. 



E in Lunamatrona paret chi bi nde apat de voluntade bona. Sa matessi Caterina Pisano, formada in su master de Cuartu s’annu coladu, credimus chi s’at a ghetare in custu disafiu cun totu sa passione e aficu chi totus li reconnoschent. Est bellu cando si biet gente chi collit su chi àteros ant cultivadu e lu mandant a in antis cun s’amore e sa generosidade chi ant leadu a modellu. In sala b’aiat àteros de custos atrividos chi ant intregadu sa vida insoro a sa limba: Ricardo Solinas, Nicola Cantalupo, Emanuela Lai e Maria Elena Fulgheri, chi dae pagu at bintu su cuncursu pro s’ufìtziu de sa limba in Barùmini. 



Unu traballu chi naschet dae s’ativismu de su Sòtziu chi annos a como at batidu dinare in biddas medas pro chircare traballu a custos giovanos. Como tocat a issos a cùrrere e a progetare e a afateriare. A gente comente Maria Elena Fulgheri o Caderina Pisano pertocat su dovere de sighire s’arrastu de chie los at agiudados sena presentare parcellas. Cosa chi non totus faghent. Fintzas proite sos Campidanos, sa Trexenta e àteras terras de sa Sardigna meridionale podent fàghere meda pro sa chistione de sa limba. Mescamente si non sighint sa bia faddida de su separatismu linguìsticu, ma chircant cuss’unidade bera de sos sardos chi amparat totu sas diversidades punnende a sa modernidade