Est essidu pro sa domo editora Domus de Janas de Ceraxus "Il quinto moro - Soru e il Sorismo" unu libru chi analizat su pensu e sas fainas de su Presidente de sa Regione. Amus intervistadu unu de sos autores Bachisio Bandinu chi at respostu a sas pregontas. Inoghe si podet lèghere unu capìtulu in pdf de s'òpera cussu intregadu a sos intelletuales chi ant apogiadu dae primìtzios su programma presidentziale. 



Su libru s'at a presentare in Casteddu chenàbura 15 freàrgiu a oras de sas 17.30 in s'auditorium Banca Cis in viale Bonaria. Sos relatores sunt Placido Cherchi, Gianni Loy, Paolo Fadda, Romano Cannas. 



"Il quinto moro - Soru e il Sorismo" no est unu "instant book" e mancu unu sàgiu polìticu. Resultat unu libru malu a classificare. Comente lu dias a definire tue? 



Est pròpiu gasi: unu libru malu a classificare. Est una cronistòria cun calicunu cummentu. Si leghent documentos medas, relatas, artìculos giornalìsticos. Si faghet unu tessìngiu e un'analizu, ma sena perunu sèberu ideològicu.



Dae ue naschet s'idea de custu progetu editoriale chi, si cumprendet, no at chertu de seguru pagu traballu? 



S'idea est naschida dae sos arrejonos annu pro annu de sa Fondazione Sardinia: deretu s'argumentu est partu "intrigante", e pro custu si detzidet de fàghere una trintena de intervistas a personàgios de sa polìtica, de su sindacadu, a industriales, a intelletuales, collende materiale chi interessat ma finas controit. Su traballu prus tostu est istada sa catalogatzione de su materiale, e a pustis un annu de iscritura. 



Resessis in pagas paràulas a istrìnghere su chi nd'est bessidu a pìgiu dae s'analizu de sa personalidade polìtica, s'òpera e sos pensos de su Presidente de sa Regione? 



S'analizu de su pessonàgiu Soru est essida a pìgiu dae sos interventos suos, dae su programma, dae s'acumprimentu de partes de su programma, dae sa comunicatzione cun sos interlocutores. 



Proite Renato Soru moet sas chènscias de una bona parte de sa classe dirigente sarda (sindacados, giornales, polìticos) prus de àteros presidentes chi de seguru ant fatu prus pagas cosas de bonu pro sa Sardigna? 



Sa polìtica de Soru bogat a campu caràteres de annoamentu fortes in totu sos bessos de sa polìtica sarda e duncas pesat abolotu e a s'ispissu contierras in totu sos setores de s'economia, de s'amministratzione pùblica, de sos entes, de su sindacalismu, de s'imprenditoria, de sa manera traditzionale de fàghere polìtica. Proponet unu modellu nou chi truncat sos echilìbrios cunsagrados dae tempus meda. 



Non seis istados agigu bonos cun sos sindacados sardos chi, si podet dare, sunt de sos prus chi ant curpa in sas peleas econòmicas e sotziales sardas?



Cun sos sindacados sardos su cunflitu naschet dae sa chistione "concertazione", pro sos sindacados ogni progetu de su Presidente (reformas sòtzio-econòmicu-amministrativas) depet èssere discutidu cun sa fortzas sotziales, e duncas cunsertare sas lìnias de s'isvilupu; Soru in tames distinghet deretos e doveres de su guvernu dae cussos de su sindacadu. Ruolos diferentes in totu: su Presidente guvernat a manera autònoma e a sos sindacados pedit propostas e valutaziones ebia. 



Cale sunt sas relatas de Soru cun sos intelletuales?



Soru at seberadu unu fiotu de intelletuales afermados, mescamente chi traballaiant in s'Universidade: s'elementu chi ispantat est chi su pensu e sas detziones de Soru subra sa cultura e subra s'identidade sarda controit a manera forte cun sa visione de sos intelletuales chi at cramadu a su costadu suo: identidade, limba, iscola. 



S'identidade fiat in su coro de su programma de Soru. Nd'at giuadu o no sa Sardigna? Si nd'est abigiada s'ìsula de custa novidade?



A mie paret chi su cuntzetu de Soru subra s'identidade sarda siat una conchista polìtica manna: comente si sunt pesados contras intelletuales medas est sa proa de su caràtere de annoamentu, mescamente ca at punnadu s'identidade a s'isvilupu a fatores econòmicos pretzisos. 



Comente giuigas su chi Soru at fatu pro sa limba? 



Soru at postu in motu una manera noa de fàghere polìtica linguìstica, creet chi sa limba siat unu fatore de importu de s'identidade sarda. 



Ite tocat a fàghere de àteru?



Tocat a bìdere si custu atentu pro sa limba sarda si traduet in sèberos polìticos pretzisos: insegnamentu de su sardu in sas iscolas, bilinguismu finas in sos setores de sa comunicatzione de massa, formatzione de sos operadores linguìsticos. 



Ma, in concruos, Soru est unu "sardista" culturale o no?



Soru at postu unas cantas chistiones cuncretas chi su matessi Partidu sardu de Atzione aiat semper difesu a livellu teòricu, ma mai acumpridu. Su Partidu Sardu de Atzione no at mai elaboradu sa chistione de sa limba. Diferente est sa chistione in su bessu de s'istitutzione, de sas reformas istitutzionales: at refudadu s'Assemblea Costituente, est pende.pende tra unu cuntzetu federalista a moda tedesca, mentovadu prus de una borta, e unu cuntzetu prus interessante de creze ispagnola (Catalùnia - Madrid). Finas sa Lege Istatutària est meda moderada. Como s'at a bìdere comente Soru cheret andare a in antis e aproare s'istatutu nou. Custu est su puntu de ghia subra su cale s'at a pòdere medire sa polìtica "identitària" de Soru. 



Cales sunt sos primos cummentos cualificados a su libru? 



In sas primas essidas b'at una carchi dificultade a nche colare su tifu polìticu-partìticu. Ma totu custas chistiones in tames cherent aprofundidas e medidas sena passiones de parte. 



diariulimba©



link a su pdf pro su capìtulu de su libru subra sos intelletuales



Il Quinto Moro - Soru e il sorismo
Bachisio Bandinu - Salvatore Cubeddu

La figura di Renato Soru ha sconvolto gli assetti tradizionali della politica. L’intendimento del libro è quello di suscitare un dibattito per tentare di porre al centro una nuova definizione della Sardegna. È importante cogliere nella sua complessità il processo in corso, pieno di contraddizioni e di interrogativi, e seguirne gli sviluppi problematici con esiti da verificare continuamente nel farsi delle cose. In questo contesto la scena non appartiene soltanto agli attori tradizionali del teatro politico, ma anche ai cittadini, chiamati a una presenza propositiva e critica. 

Anno di pubblicazione: 2007
Pagine: 286
Illustrazioni: Nessuna
ISBN: 978 8888569 66 6
Peso: 530 grg
Formato: 15,5 x 23,5
Collana: Nessuna
Supporto: 

.