Est capitadu su chi in medas timiant. Su Guvernu italianu at impugnadu sa lege noa pro su friulanu a dae in antis de sa Corte Costitutzionale. Est un’atu grae, reatzionàriu e antieuropeu, acumpridu dae un’esecutivu comomai dimissionàriu in mesu de una campagna eletorale de sas prus particulares chi b’at àpidu in Itàlia in custos annos. Tullio De Mauro, su linguista italianu prus mannu, at faeddadu a su “Corriere della Sera” de ”violatzione de sos deretos umanos” e mi creo chi a custu puntu sa chistione siat pròpiu in custos tretos. 



S’istadu italianu, chi est andende male pro paritzas cosas, non resesset a essire dae una visione de s’organizatzione istatale tzentralista, natzionalista e repressiva pro sas minorias internas de cada genia. Comente ammostrat finas su cumportamentu de sa Corte Costitutzionale contras a sa Regione Sardigna pro sa tassa de sas domos in mare (comente a nàrrere chi su pòpulu sardu non tenet deretu a guvernare in domo sua), custas fatas sunt s’ispia de s’arretratesa culturale chi imperat oe in s’ex “Bel Paese”. E bastat a annànghere, in un’àteru bessu, comente sas fortzas polìticas prus mannas s’indughent a sas ideas prus antigòrias (e a parre meu anticristianas) de sa crèsia catolica (negatzione de sa libertade de sèberu pro s’aurtìngiu, de sos deretos tziviles de sos omossessuales, de sa libertade de sa chirca iscientìfica, de sa felitzidade chi sa fecundatzione artifitziale podet dare a famìlias in dificultade) pro cumprèndere chi in Itàlia semus bivende oru·oru a unu vulcanu oscurantista. 



Pro sa lege friulana si cuntestant paritzos puntos, ma mescamente s’intrada ufitziale de sa limba de minoria in sas iscolas. Una detzisione chi lassat siddidos pro comente burrat in unu corpu sas isperas chi s’initziativa de sos ativistas friulanos aiat istrinadu finas a sas àteras minorias, incluida cussa sarda. Si s’istadu italianu negat su printzìpiu chi unu pitzinnu chi faeddat un’àtera limba chi non siat s’italiana, non la potzat faeddare e istudiare in iscola, si ponet foras de su mundu tzivile e de s’Europa.



A banda sas chistiones de soberania e separatismu (ca sos partidos sardistas e indipendentistas, comente sos àteros, de limba si nde òcupant pagu e nudda si non in campagna eletorale) su chi non cumprendet sa classe dirigente italiana (e bona parte de sa classe locale sarda o friulana chi siat) est chi sas limbas de minoria non faghent dannu a s’istadu unitàriu de oe o de cras. Antis, afòrtiant sa coesione sotziale gasi comente est disinnada dae s’Unione Europea. 



Ca valorizende sa limba de minoria in iscola, in s’amministratzione e in sos mèdios, si valorizant sas pessones chi la faeddant e chi mai nemos at carculadu. E si valorizant finas sas pessones chi non l’ant imparada pro negatzione de s’istadu ca s’intendent mancantes de calicuna cosa in s’intragna issoro. Valorizada gasi a custa manera sa populatzione abandada s’intendet prus in domo sua, istimat de prus sa terra, sas cosas comunas, su prossimu, sa pàtria. S’economia nde balàngiat, traballat de prus, est prus creativa e respetosa dae su puntu de vista tzìvicu ca crèet chi s’istadu li mantèngiat s’identidade sua.



Est finas cussu chi s’Europa ìndicat comente “coesione sotziale” e est pro cussu chi ocannu at decretadu s’annu europeu de sas limbas. E, a dolu mannu, s’Italia ipòcrita e natzionalista de semper, europeista petzi cando li cumbenit, at agatadu su modu sua rebestu de lu festare. 


Pepe Coròngiu

Liòngiu a Cisilino

Liòngiu a Impugnativa friulanu

Liòngiu a s’artìculu de su Corriere della Sera



Liòngiu a su documentu de su comitadu friulanu 482/99