A bisu de s'editore Fabio Pillonca, chi ghiat s'editora Domus de Janas de Selargius, su libru "Pro una limba ufitziale" est unu "casu" editoriale. De sas còpias imprentadas cun sa prima editzione a s'editore nde nd'at abarradu una trintena. E mentres si podet dare chi unas 150 siant a giru pro librerias e non s'ischit si sunt bèndidas o nono, sas còpias bendidas resultant prus de otighentos. Est unu resurtu mannu pro unu libru iscritu in sardu e chi si presentat comente òpera tècnica pro ispetzialistas. Sos nùmeros normales de unu libru in limba sunt medas prus bassos. Ma, a manera òvia, totu custu no at a interessare sos fraigadores de opiniones chi iscrient in sos giornales. Su manuale iscritu dae Giuseppe Corongiu, diretore de Diariulimba, at duncas demostradu chi a iscrìere in sardu, cando b'at seriedade e cumpetèntzia, podet finas torrare a contu pro chie lu faghet e pro chie pùblicat. Custu faghet isperare bene finas pro sos àteros libros de sa literadura sarda, mescamente sos romazos, chi a in antis o a pustis ant a leare s'acoglièntzia chi meressent. In un annu, prus o mancu, su libru de Corongiu at otentu unu acatu bonu dae su pùblicu mancari chi no apat merèssidu, dae banda de sos giornales sardos prus importantes, mancu una retzensione. 'Unicas etzetziones duas mentovos de Salvatore Tola e Tonino Oppes chi autore e editore rongratziant meda.