S'at a fàghere su referend pro unire sos ladinos in un'ùnica entitade amministrativa? Sa proposta est a craru. Su "Moviment Politich Ladins" at fatu ischire chi li agradat sa dimanda chi ant fatu sas uniones ladinas de Ampez, Col e Fodom a sas comunas pro cuncordare unu iscumprou a votatzione chi diat sa possibilidade de intrare totus in pare in sa Provìntzia Autònoma de Boltzanu. Una essida chi diat serbire pro issorvere sa trumentada chistione de s'identidade istòrica ladina e s'unidade linguìstica ufitziale. Sos germanofonos de s'Adige Artu, finas si tutelant e dant dinare pro sa limba, guvernant a modu de istesiare sèmpere de prus sos ladinos chi sunt in su territòriu insoro dae sos ladinos chi sunt "espostos" a s'influèntzia italiana in àteras regiones. Sunt custos chi, a como, cherent intrare in sa Provìntzia Sudtirolesa pro chircare gasi de minimare sas diferèntzias. 



fons: Noeles.net