Cun s'ufitzializatzione de sos finatziamentos pro sa Sardigna cun sa lege 482/99 pro su 2005, est prus crara sa polìtica linguìstica de su guvernu istatale de tzentru manca. Su presidente de su Cunsìgiu Romano Prodi at truncadu sos agiudos finantziàrios a sas limbas de minoria de belle su 50 pro chentu pro tres annos finas a su 2009. Paris cun custa medida, si benit a ischire chi su matessi tantu de dinare sa Repùbrica Italiana l'at destinadu a sos "italianos" chi paret chi bivant a palas de sas làcanas de s'Istadu in Slovenia e Croàtzia. Si faeddat de belle 30 mìgia pessones pro sos cales su guvernu at dispostu de dare 4 miliones e 650 mìgia euros dae oe a su 2009. Si seberat de finantziare duncas una limba, s'italianu, sena averiguare si est beru chi est faeddadu, cantu e comente. In s'interis, sos mèdios polìticos mudant sa chistione de sas fòibas dae chimentu polìticu (comunistas chi ant bochidu sos fascistas) a fatu "natzionalista" (istràngios chi ant bocchidu italianos). Nde subenit chi s'Itàlia est detzidende chi sunt prus bonos 30 mìgia tzitadinos chi bivent in Croàtzia o Slovènia (e chi pagant sas tassas in cue), de miliones (forsis tres) de tzitadinos chi bivent in intro de sas làcanas de s'Istadu. Ma est s'issoro sa curpa: si intostorrudant a faeddare limbas de minoria...