Est nàschida una revista noa chi dat ispàtziu a sa limba sarda. Est su periòdicu “Liberatzione sarda” chi si auto-definit “periòdicu bilingue de sa manca alternativa natzionalitària e ecopatzifista”. Su diretore est Frantziscu Casula. S’editore est su cunsigeri regionale de su partidu de sa Rifundatzione Comunista Pàulu Innàtziu Pisu. 



Su diàriu naschit pròpiu cun s’inditu de bogare a craru, rapresentare e ispainare sas ideas de unu mundu diferentziadu ma galu biu e interessante chi est sa manca de ideas natzionalitàrias e/o ecopatzifistas. In custu at tentu una parte manna s’onorevole Pàulu Pisu, lacunesu , aficosu in polìtica dae sèmpere e chi, pustis de àere ghiadu cun profetu sa comuna de sa bidda sua pro duas legisladuras (1995-2005), sedet como cun meressimentu mannu in sos iscannos de su Cunsìgiu Regionale. Pisu tenet 59 annos e est laureadu in Iscèntzias Polìticas. 





At fatu parte in sos Annos Setanta de su Comitadu pro sa Limba e Cultura de sos Sardos e, pro annos medas, est istadu finas secretàriu de Democratzia Proletària Sarda. Dae giovaneddu fiat iscritu a sa Fgci e a su Partidu Comunista. At iscritu in libros, revistas e giornales e at finas publicadu una monografia interessante chi si intitulat “Storia del Partito Comunista in Sardegna”. At militziadu in su partidu de sa Rifundatzione Comunista dae sa formazione sua e at reghidu incàrrigos finas in sa secreteria regionale. 





In su 2004 est devènnidu Cunsigeri Regionale in su cullègiu de Aristanis e est istadu numenadu Presidente de sa II Commissione Permanente de su Cunsìgiu Regionale de sa Sardigna chi si ocupat de Polìticas Comunitàrias, deretos tziviles, emigratzione e immigratzione. Est mere de unu giassu internet http://www.paolopisu.com/ chi cungiamus de bisitare pro abbaidare “Liberazione sarda” in formadu pdf . Bos cungiamus de ghetare un’ogru finas a sa Galleria Fotografica inue lu podides bìere retratadu cun Arafat, Joice Lussu, Mario Melis e Giuanne Lilliu. 





Su primu nùmeru de “Liberatzione sarda” cuntenet s’editoriale de su diretore e su programma de s’editore chi cheret abbèrrere un’ispàtziu pro sa Sardigna chi, dae Manca, si cheret ocupare de natzionalidade, ambiente, limba, cultura e giustitzia sotziale. Si faeddat de Tzerachias militares, femminismu, de su cungressu de Rifundatzione Comunista, de Antoni Gramsci e de su precariadu sotziale. In prus b’at un’artìculu in sardu chi faeddat de istandards linguìsticos. 





Paolo Pisu, chi dae sèmpere est unu comunista natzionalitàriu, e chi traballat meda pro sa limba sarda, cun custa iniziativa cumprit una faina de importu pro democratizare su dibàtitu culturale e polìticu in Sardigna. 





Pro lèghere e pedire sa revista in paperi puru abaidare a http://www.paolopisu.com/ .