Sos giòvanos bilìngues sunt capassos de respòndere mègius in situatziones cumplicadas de sa bida. Unu istùdiu de su Grupu de Chirca en Neuroiscièntzias Cognitivas de sa Universidade de Barcelona (Catalùnia) at iscoviadu chi sos giòvanos chi faeddant duas limbas tenent unu rendimentu prus mannu e prus forte in conforma a cuddos chi nde manìgiant una ebbia. Custa capassidade de èssere prus ativos de sos àteros essit a campu finas in chistiones in ue non serbit a impreare su limbàgiu. De esperimentos nd’ at resurtadu chi b’at cumportamentos prus cumpetitivos, pro esempru, in su ischire seberare sas informatziones chi giuant pro issòrvere una chistione o unu fatu illomboradu. Sende chi cando faeddant sas pessones bilìngues depent a fitianu bardare sas formas de sas duas limbas, su cherbeddu est allenadu e prontu a seberare elementos importantes in momentos difìtziles prus de unu monolìngue. Imaginade tando ite dannu ant fatu e faghent a sos fìgios sos chi detzident de los pesare in italianu ebbia furande-che-li s’arma atzuda pro sa vida chi diat èssere sa connoschèntzia de sa limba sarda. Su bilinguismu chi contat est solu cussu fatu in domo, non contat a imparare s’ingresu o àteras limbas in iscola. S’Istùdiu est publicadu in sa revista eletronica “Cognition”. 


Fons: Diari de Girona, 14.02.2007