Dae pagas dies sos sardos de totu su mundu podent iscurtare Piras e Tucone in su 1965 in Samugheo. O Sotgiu e Piredda in Sèneghe in su 1964. O Màsala e Pazzola a sèberu. Sas garas registradas de sos cantadores prus mannos de sa poesia a bolu sunt a disponimentu in sa Retze a indonu. Est s’ùrtima faina de sa Regione Autònoma de sa Sardigna pro valorizare sa limba e sa cultura sarda. 



Intro de su portale www.sardegnacultura.it, setore limba sarda, b’at 20 garas chi si podent iscurtare intreas cun unu clic de su sorigheddu de su elaboradore. In prus b’est su resumu de totu s’istòria de sas garas dae s’antigòriu misteriosu, colende pro sa règula fata dae tiu Antoni Cubeddu, finas a sos de oe Bruno Agus, Zusepe Porcu o Peppinu Donaera. 





B’at finas una setzione didàtica pro ispricare a sos chi nde ischint pagu e nudda comente si cumponet un’otada, comente si faghet una gara e finas comente si cantat una batorina. Non mancant mancu sas biografias de sos cantadores mannos e minores de totu sos tempos. Remundu Piras cun Barore Tucone, Giuanne Seu cun Gavinu Còntene o Antoni Pazzola cun Bernardu Zizi. 





A cantu paret totu un’idea de su presidente Renato Soru pro chircare de torrare alientu a una traditzione bella meda chi est rischende de èssere ismentigada in sos tempos modernos. Una moda de cantare chi est connota e imbidiada in totu su mundu e chi diat èssere pretzisu de torrare a annoare in antis chi si che isperdat de su totu. 



Bellas finas sas fotografias postas in lìnia chi retratant sos “eroes” de sas pratzas sardas in gara o in momentos de pàusu. Sas binti garas (de sas cales 10 ant sa trascritzione in sardu puru) sunt solu unu primu passu de sa formatzione de unu Archìviu Multimediale de sas garas chi sa Regione at a cumpretare intro tres annos. 





Finas una manera pretzisa de si mòvere de una Regione chi at cumpresu s’importàntzia simbòlica de sa limba e de sa cultura sarda. Sighende gosi no ant a mancare àteras e prus pretzisas fainas in agiudu a sa limba moderna puru.





http://www.sardegnacultura.it/linguasarda/letteratura/poesiabolu/