Presentatzioni de 

GUVERNARE CUN SA LIMBA de Peppi Corongiu

Abas(Ales), 2006 su de 15 mes’e idas 



Deppeus torrai gratzias a Peppi Corongiu po su libru ki at scrittu... incappa no est su primu ki affrontat tematicas de custu tipu scrittu tottu in sardu, ma sicuramenti est unu de is pagus, ki consideraus ca est revoltu a tottus e no a una categoria particulari, de solitu is iscolas (giustamenti puru, poita de in gunis specialmenti depit partiri sa reconquista de sa limba de pati de is sardus).

Unu primu spuntu de interessu, anzis una kistioni fundamentali (ki assoba iat a kerri s’iscriidura de librus e sa cuncodratura de dibattus) d’agattu giai me in s’antepositu (sa prefatzioni). Est su spiritu ki si ponit Peppi annantis a sa limba, s’impleu de prus variedadis specialmenti, no po su fatu attottu, ma po sa cuscentzia ca custa est una specificidadi de su sardu e donnia varianti meritat respettu, ki siat de Papillois o de Maracalagois, cun ruspettu narendi.

Custa kistioni si nci portat lluegu a sa cunsideratzioni ca no est sempiri ainci. Ci fuit prus unidadi (assumancu apparenti) prima de sa lei 26 e de sa 482 ki immoi. A bortas nos sardus seus meda evangelicus (poita si podessit cupriri sa profetzia, o su ki est iscrittu), me in su sensu ca respettaus prus is dicius (centu concas...) ca su ki s’iat a cumbeni.

Ma custa est feti una brulla, poita in beridadi, no si ndi podeus scabulli de su vitziu de essi individualistas (ollu nai ca donniunu olit fai secundu sa bidea sua) e peus, pòni annantis a s’interessu de sa limba, interessus de pati.

Poita no est possibili ca si dibattit in modu cuncodrau de limba, minimu de su ‘77 o annus infattu e immoi c’est prus divisioni de prima.

S’arraxionamentu sbagliau est poni asutta sa limba a interessus de pati, e po pati pensu a partidus e atras organitzatzionis culturalis, politicas et economicas.

A si liberai de custu pregiuditziu iat a bolli nai donai liberu campu a is initziativas limbisticas, kentza calculus e timoria e diaberus guvernare cun sa limba.

Guvernare cun sa limba bolit nai puru a si liberai de unu modu becciu de fai politica ki no pagat po nudda. Est bregungia ca medas sardus e po fintzas medas amministradoris sardus siant prus agoa de su parlamentu italianu, ki s’at donau (po bolla o po marolla) sa pari dignidati tra sardu e italianu.

Epùru parrit ki medas sardus timant su sardu; ddu kistionant e ddu timint, in medas casus est unu refudu de sa propria identidati e insaras sa cosa si fait trista.

Torrendi a su ki at iscrittu Peppi, creu propriu ki sa solutzioni siat cussa... Impleai is variedadis esistentis est sa manera e su spiritu giustu po lompi una die a s’unidadi vera de sa limba... custa est s’unica cosa po ki no depeus tei pressi... sa limba si format e si uniformat cun su cuntattu de sa genti e su processu no tenit fini.

Duncas su dibattu infiniu asuba de sa limba iscritta podit serbiri puru, bastat ki si inghitzit a teni una grammatica uffitziali, equilibrada, rispettosa me in sa morfologia, sa sintassi, su lessicu, de is variantis principalis, kena creai squilibrius, ma kena sighiri cun is vetus... tanti sa limba da fait sa genti e no podit esisti una limba scritta ki no tengiat contu de comenti si kistionat.

Manzoni po s’Italianu si fut acuttu a imponi su dialettu fiorentinu, in polemica cun Ascoli ca fut po sa formatzioni graduali de sa limba. Immoi puru s’acattaus ca s’italianu ki si kistionat, a pati pagus regionis, est diffarenti de comenti si iscriit e sa limba iscritta s’in c’est istresiada meda de su tempus de Manzoni: a is puristas megant a si nci cambiai is ki pensat ca sa limba e is regulas dd’as faint is ki fueddant (“i parlanti”).

Po custu, sigomenti tottus non s’ant a poni mai de accordiu, s’impurtanti est partiri: mancai una regula giusta iat a depi essi, comenti appu nau, su rispettu de is variantis principalis, cosa no difficili de realitzai; bastat, a mudai cussu ki podit parri un handicap in d’una rikesa, permittendi in sa matessi limba sa possibilidat de si esprimi in dus modus, de podi tzerriai una cosa in dus modus, kentza fai passai fueddus diversus po variatzionis foneticas. No esistit me in su sardu sa limba pura o sa limba vulgari, est tottu pura e tottu vulgari (del volgo), de sa genti.

Nau custu, e si iat a podi nai medas atras cosas, deu pentzu ki atobius comenti ai custu no potzant ke fai beni a totus e duncas sigu a no cumprendi poita ci siant ancora sardus ki si stresiant de su sardu o addirittura siant contra a su sardu e duncas a issus etotu.



MASSIMO PISTIS



laureau in Littaras in Kasteddu, cun dd’una testi a pitzus de su periudu rivolutzionariu sardu e sa figura de Mons. Michele Aymerich, obiscu de Abas e delegau po is cinqui domandas a su rej. 

In su 1995 at fundau s’Accademia po sa die sarda. Militanti sardu e sardianu.





grafia particulari xoberada:

ch = k 

usu de sa q