Bonas festas a chie nde tenet. E a chie non d’at.
A cussos chi no ant paghe in domo insoro e finas a cussos chi che la mandant imboligada dae una bomba, sa paghe. A chie nd’at pagu, paghe. 

Bona festa li siat a chie faghet errore ca est faghende.A chie si cheret mere in domo sua. A chie morit chena libertade, a sos chi pro sa libertade morint. Finas a chie faghet morrere de su risu mentovendela a bucca prena. Mancari fitianu fagat tìmere cando invocant su diritu de la fàghere mòrrere, sa libertade. 

A sos chi andant. A sos chi torrant. A sos chi andant e torrant. A sos chi a bortas torrant. A sos chi “bazibonche!”
A cussos chi sunt atesu dae in ue si cherent, a cuddos chi no cherent sos chi tenet acurtzu.

A sos chi sunt ampilende sa conca, a chie no cheret. A chie ochit in numene de Deus, a chie pro Deus si ochit. A chie paret chi no lu bidat Deus. Deus cherfat chi colet bona festa.

Bona festa a chie comporat e a chie non comporat. Bona festa a chie si comporat sa festa, a chie si la bendet cumbintu de comporare festa cun cussu dinari. 

Pasca bona de nadale a chie lu pagant e no traballat, ma de prus a s’ateru.
Bona festa a chie binchet ca dait sensu a chie perdet e ca fortzis no si binchet e nen si perdet mai de su totu. A chie si perdet in su nudda, non faghet nudda ca su lassadu no est pèrdidu. Torrat a colare. Fortzis. 
E a sos chi arribant paris, sorte bona lis siat, ca a sa sigura ant pèrdidu ambos, si no ant bìnchidu. 
A chie non tenet boghe, a chie bidet ma est tzegu, pro como. A chie faeddat sena nàrrere. A chie est in s’iscuru mancari tenzat aria meda e lughe. A orariu. 

A chie si cheret giudicadu e non petzi cundennadu. A chie sentèntziat, pro chi fagat in presse li siat festa bona e annu. Ma in intro de ocannu, bastat chi siat. A chie bivet de ispera si no at àteru.
A chie pranghet pro non riere (no, no apo isbagliadu) ca est istracu finas de rìere de su chi no andat bene. A sos chi lis andat totu bene, bonu proe lis fagat. A sos chi lis zirat male: ditzosos, ca lis potet galu andare bene carchi cosa. A chie istat mudu, a chie non faghet degogliu ma nant chi at fatu degoglione. A chie tenet cogliones e nd’est coglionadu fitianu. Coglione. 

A chie los tenet in terra e a chie che li falant, sos bratzos, intames de los ampilare a galavera. Bona festa a chie guvernat pro chi tenzat fide chi calesisiat cosa mai fata est bene fata, totu s’àtera no andat bene. O non b’est.. A chie non si bidedet, bona festa invisibile, li siat (gai si la gosat , nessi) e annu nou. 

Bona festa a chie est sèmpere a dainnantis, ca assumancu a fortza de cùrrere potet ispìnghere sos chi sunt a coiza, dae daisegus, cando agabat su ziru de sa terra. Festa bona e bona volontade a chie tenet gana de pompiare addane, pruite, cando arribant totus est tropu tardu pro torrare a isbagliare. 

Festa bona a chie est a manca e chie est a dereta ca est petzi pro su tantu de andare o de torrare cussu istadu. Poscas càmbiat. Annu bonu li siat finas a chie frenat o atzèllerat ca non tenet s’abistesa de tòrchere e zirare cun profetu. Como o tando ch’at a rùere a modde in cabu de susu o cabu de giosso. O si nono, si arreat firmu, s’at a infùndere ca su mundu zirat (l’apo nadu pagas rias susu) mancari siant in medas a non chèrrere. In Sardigna est gasi, b’est su mare. 

Bona festa a sos antigos. Ma petzi a cussos antigos. Ca sos antigos modernos sunt antigos e no sunt a passu cun su tempus. 
Festa bona a chie s’inchietat ca sunt tropu chietos sos inchietos. E fortzis abòghinant pro ispantare sos chi sunt aberu inchietos, ca cherent chi abarret chieta ogni cosa.

Bona festa a chie nde cheret duas de cosas. A chie treghentas. Mancari in beridade non nde cherfant mancuna, bona festa su matessi. A chie nde cheret una, bona festa de nadale e annu bonu li siat, ca la tenet mancari non siat mudada a festa. Galu.
Bona pasca de nadale a chie non la pessat che a mie. Ca la pesso che a isse deo puru, contra a mie, pro non fàghere errore isbagliende ogni die. Ma torrende a isbagliare a su mancu, a fortza de esperièntzia.

Bonas pascas a chie iscriet pessende. A chie iscriet pessos. E finas a chie poetat, mancari maccu.
E a chie lezet chi sigat gasi, assinzende e nende su chi lezet. Ma bona, sa festa, li siat finas a chie narat sena lèzere, su chi est galanu e su chi est lezu.

Festa bona si colent totu sos limbudos de sa terra mascamente sos chi faeddant pagu e finas sos àteros. 
Festa bona si colent sos chi tenent su corazu de sa festa e tenent carchi iscuta pro sonniare. A risu in laras, finas cando totu paret grae e a disora, si potet bolare. 

Antonimaria Pala