Su giaju tzèrriat a su nebodeddu: “Bae e anda in s’aposentu de babbu tuo, aberi su calàsciu e lea•mi duas de cuddas pastilleddas biaitas chi b’as a agatare!. “No andat bene, babbu s’annicat e m’iscudet!”. “Bae chi non ti tocat, no l’amus a nàrrere nudda, giai m’isto a sa muda cantu a tie, chi non mi cumbenit!”. “No, lu timo meda a dae chi fatzo sas cosas chi non cherent fatas!”. Su giaju tando, pro nche lu cumbìnchere, si nde bogat deghe èuros e bi los faghet a bìdere. “Mi’, su chi ti do si mi faghes su cumandu, giai l’ischis chi giaju tuo tenet una pensionedda ma si mi faghes custu cumandu ti los do!”. Su nebodeddu cumentzat a adduire de prus, deghe èuros fiat su dinari chi retziat in duas chidas nessi. “ E dae•mi•los da’!”. “No, in antis mi faghes su cumandu e posca ti los apo a dare!”. Su pitzinnu curret a s’aposentu de su babbu, in presse nche li furat duas de cuddas pastilleddas, torrat in lestresa, las ponet in sa manu de su donnu mannu e pròpiu in su peristante chi su giàju andat a li dare su chi l’aiat promissu intrat su babbu. “E ite b’at inoghe, custu curre•curre?”. Su giàju tando, costoende sas pastilleddas, bogat una fàula: “mi’ fìgiu tou m’at batidu sa dentiera, est faghende de bravu, cuntenta•lu mi’…”. Su babbu creet a cudda fàula e su pitzinnu resessit a si nch’essire sena problemas, ma fintzas sena dinari. Ma s’incras, comente aberit sos ogros,bidet chimbanta èuros subra su taulinu de s’aposentu suo. Luego pensat chi su nonnu s’est faddidu, ca non bidet mancu a isse, e ischende finas chi tenet pagu dinari no lu cheret futire e nd’at dolu. Andat, bi los faghet a bìdere e li narat: “Mì chi ti ses faddidu, pro su cumandu de deris m’aias promissu deghe èuros e mi nd’as lassadu chimbanta, to’….!”. E su giàju: “no no, lassa•ti•los: baranta ti nche los imbiat giàja tua!!!!!”

Cristiano Becciu