In Friuli sunt resessidos a nche pònnere sa limba de minoria issoro in s’iscola, un’ora a sa chida. Un'ora de friulanu est a òbligu in totu sas iscolas e chie no la cheret fàghere lu depet comunicare. In Sardigna galu sunt sighende cun sas letziones fatas “furende” tempus a sa programmatzione obligatòria, e sena ghia didàtica de giudu, a s’aparpu e gasi comente lis resessit.
In una de custas letziones, si fiat faeddende de animales. “Tando – pregontat sa maistra a unu pitzinnu chi su sardu l’ischiat faeddare comente si tocat - nara•mi un’animale chi cumentzat cun sa L!”. “E cussu: “Leone!”. “Andat bene, como unu cun sa S!”. E sui pitzinnu, seguru: “Su leone!”. E sa maistra: “no, ma ite ses narende, dae atentu, nara•mi•nde unu cun sa C como….”. E su pitzinnu: “Chi no at a èssere su leone….?!”.

Cristiano Becciu