Un'apuntadu de carabineris pibincu•pibincu firmat a un'òmine chi est recuende dae traballare. “Patente e carta de circulatzione!”. S'òmine, sena mancu una paràula, bi ddos porrit in lestresa. Su carabineri bidende chi in sa fotografia de sa patente fiat prus giòvanu meda narat a s'òmine: “vostè si depet fàghere un'àtera fotografia pro chi sas fortzas de s'òrdine non tèngiant problemas a dda connòschere. Ddi fatzo una contaventzione de binti èuros!”. “Ma...ma... -ispricat s'òmine- cale lege ddu narat?”. “Si dda sighit gosi b'annango àteros trinta èuros pro oltràgiu a unu pùblicu ufitziale!”. “Però – sighit s'apuntadu – si vostè intzertat un'indevìngiu chi ddi pòngio, tando non ddi fatzo sa contraventzione!”. S'automobilista, cumprendende chi cussu fiat unu carabineri severu, pibincu e a contu suo, adduit a sa proposta e ascurtat s'indevìngiu. “Ite est cussa?” e inditat sa màchina de sos carabineris. S'òmine respondet sena duda: “est sa gazella de sos carabineris!”. Faghende chi nono cun sa conca, su pùblicu ufitziale annanghet: “e no, una gazella ford o una gazella opel? Una gazella renault o una gazella mercedes?...est una gazella fiat! Vostè non m'at naradu su modellu: podiat èssere cale si siat màchina!”. E gasi iscriet sa contaventzione e dda cunsignat a s'òmine chi teniat cubadu s'arrennegu pro cudda manera de fàghere”. Colant sas dies. A pustis de prus de unu mese, in su matessi logu, su matessi postu de blocu. Su matessi carabineri, su matessi automobilista. “Patente e carta de circulatzione!” est sa rechesta de semper. Totu in règula francu sa fotografia: su carabineri sighit a nàrrere chi est istada fata in antis meda e podet fàghere a faddire . “E no - si pesat annicadu s'automobilista - mi so informadu dae unu fradile meu avocadu: sa foto podet abarrare cussa, s'informet imbetzes de faeddare sena connòschere sas leges!”. “Bene, vostè àrtziat finas sa boghe...contraventzione pro oltràgiu!”. “Ma - sighit - si comente so un' òmine chi ischit bajulare sas ofensas, ddi dono un'àtera possibilidade: si intzertat un'àteru indevìngiu deo apo a burrare sa contraventzione!”. S'automobilista, de acordu, connoschende sas trassas de su pùblicu ufitziale, isetat s'indevìngiu. “Ite est cussa?”, inditende semper sa màchina de serbìtziu. “Fàtzile - narat s'òmine - est una gazella FIAT de sos carabineris!”. Pariat de àere intzertadu finas a cando s'apuntadu no at naradu: “emmo, ma una gazella FIAT a benzina o a gasòliu? una gazella FIAT a duas ghennas o a bator ghennas? so custrintu a iscrìere sa contraventzione!”. S'òmine non bi cheriat crèere: l'aiat futidu un'àtera borta! Ma prima de si nche andare proponet: “S'apunta', deo sa contraventzione dda pago, ma si vostè intzertat un'indevìngiu meu dda pago a duas bias, si nono mi nde dda bogat, de acordu?”. “Andat bene!” - est sa resposta de s'apuntadu presumidu -. “Tando, presente dd'at cudda fèmina ch'istat mesu nuda peri sos istradones, bendende praghere a sos òmines, comente si narat in sardu?”. Cumbintu a s'etzessu, sena mancu b'atinare unu pagu, su carabineri deretu dat sa resposta: “Bagassa.... in sardu si narat bagassa!”. Tando s'automobilista iscantzende a rìere faghet chi nono cun sa conca: “ e no, sa bagassa de mamma tua? de sorre tua?de fìgia tua.....?”.


Cristiano Becciu
Otieri