Babbu e fìgiu recuint a domo. 
Sas fèminas chi bendent praghere peri sas istradas, a de note, faghent de manu pro chi sa màchina si firmet. Su babbu colat deretu sena nàrrere nudda a su fìgiu. Ma cuddu pregontat: “Ba', ite sunt faghende cuddas fèminas?”. Su babbu chircat de nche dd'ingaddinare: “anno' s'aereoplanu chi est decollende...!”. Su fìgiu, testarrudu, sighit : “ ite ddis est pregontende cuddu tziu chi est firmu cun issas?”. Su babbu galu proat a mudare arrèsonu: “cras ti còmporo unu giogu nou, a ddu cheres?”. “Emmo, ma nara•mi ite sunt faghende totu cuddas fèminas in s'istradone...!”. Su babbu imbentat una fàula, pro no nàrrere totu sa veridade: “fìgiu me', sunt traballende!” .“E ite faghent?” - narat su pitzinnu- “sunt bendende!” - sighit su babbu- “e ite bendent?”, galu su fìgiu. “Bendent praghere!” respondet su babbu. Una resposta chi paret acuntentare su pitzinnu chi non sighit, difatis, a pregontare. S'incras, cando su babbu est traballende, su pitzinnu pedit chimbe èuros a sa mama, narende•ddi ca su babbu l'aiat dadu su permissu de comporare una cosa. Sa mama, connoschende su maridu e sas promissas chi non faghiat mai a s'indonu, dat su dinari a su fìgiu cun seguresa. A sa lestra su pitzinnu leat su postale e tucat. Lòmpidu in su tretu de istradone in ue aiat bidu s'iscena sa die in antis, falat e porrende sos chimbe èuros a cudda fèmina narat:“chèrgio chimbe èuros de praghere!”. Cudda, chi no aiat balangiadu galu nudda, nche ddu giughet a domo sua, a manu tenta. Lòmpidos in s'aposentu, aberit s'armàriu, e faghet tres fitas lichitas de pane cun nutella: “tò, custu est su praghere de chimbe èuros!”. A su pitzinnu non paret mancu a beru.
In su peristante, su babbu recuidu dae su traballu, arresonat cun sa mama e cumprendet s'atrivida de su fìgiu, acrarende totu su chi fiat sutzessu in màchina. Ambos duos timent chi siat sutzessa cosa mala. Recuit su pitzinnu, allegru che paba. “In ue che fias?- sa prima pregonta. “A sa de cudda fèmina de eris, m'apo comporadu chimbe èuros de praghere!”. “Comenteeeee - narat su babbu disisperadu - e ite as fatu?
E su pitzinnu: “Ba', duas bi so resessidu a mi ddas fàghere, sa de tres l'apo linta ebbia...!”
Babbu e mama ruent a terra dismajados.....



Cristiano Becciu
Otieri