S’atera die, unu cumpanzu meu, chi est comente unu frade pro a mie, m’at dimandadu pruitte mi soe lamentadu in s’articulu de su 21 de ghennarzu, pro s’istipendiu mediu chi tenet unu Responsabile ULS, chi benit pagadu pro 45 oras a su mese, 700 euros.
Su cumpanzu meu, m’at amentadu chi, in custa stagione de “carestia” e de “pagu dinari”, 700 euros no sunt pagos. E tenet ragione.
Deo cheria solu narrer chi sos finanziamentos sunt d’onni annu sempre prus pagu e chi cun sos “Isportellos Sovracomunales”, pro s’Operadore ant crescher finas sas ispesas, pro unu triballu chi propriu pro custa “nadura” sovracomunale, at a esser semper prus distante dae s’identidade sas biddas e at a costringher s’Operadore a fagher ateros triballos, pro si fagher unu “istipendiu” de su mancu 1.000 euros a su mese.
No discuto sas “potaturas” chi ant a fagher a sos finanziamentos, e nemmancu sa paga oraria chi est tra sos 15 e sos 22 euros lordos a ora, ma creo siat ora, de dimandare a sa Regione, de fagher un atoppu cun tottus sos Operadores ULS, pro chircare de tenner un’ispera pro su nostru benidore in custu triballu: finas impreende pro a nois, posca sos dinararis de sa Leze 482/99 (Limba), fina cussos de sa Leze Regionale 26/97 (Cultura e Limba).
Sa proposta chi deo cherzo lanciare est cussa de fagher crescher sa figura de sos Operadores Uls chi tenent ateras cumpetenzias (archeologicas, istorigas, tradiziones populares, ecc.), in sa d’una figura de “Paladinos” de s’identidade e sa cultura sarda d’onni bidda, finas cussas minores.
Non solu “Operadores” de Limba, ma “Operadores de Cultura e Limba Sarda”!
Est una proposta pro sa Regione, pro sos Dirigentes e pro nois Operadores, subra sa cale, ne devimos faeddare, chirchende tottus impare cun sa nostra capacidade de fagher “comuna” de nos daer unu benidore.
Mario A. Sanna – Resp. ULS de sa Comuna de Sindia- NU
|