E tando mancari nche siant coladas prus dies, mi faghet praghere a bos iscrìere sas impressiones subra su adòviu de chenàpura colada in Casteddu.

Est istada sa prima borta chi totu sos operadores de limba sarda de s'ìsula siant istados reunidos; sos problemas chi sunt bessidos a campu sunt semper sos matessi, impreu de su sardu in iscola e in cale si siat àmbitu. S'iscola, tzertu tenet unu ruolu fundamentale ma creo chi issa non potzat nudda si sa fàmìllia non li faghet costazu, est a nàrrere chi mancari si fetant milli laboratòrios e sos pitzinnos non intendent su sardu in domo su caminu chi si faghet no est cumpletu. Diat a èssere bonu chi iscola e famìllia traballent paris, collàborent. 

Calicunu diat a chèrrere sùbitu su bilinguismu in sas iscolas pro totu sas matèrias, deo non nde seo tantu cumbinta ca gasi est a cùrrere tropu e a bortas currende meda unu s'iscollat... e tando mègius pagu ma bene fatu: aberimus in sas iscolas custos beneditos laboratòrios cun su sardu comente limba veiculare, però comintzamus a lu fàghere bene e in totue, in cale si siat iscola. 

Pensamus unu pagu...... non semus prontos a una situatzione de bilinguismu totale pro totu sas matèrias in s'iscola, chi bi ponimus? Sos operadores? Non diat èssere una bidea mala, ma totu sos operadores tenent sos tìtulos pro fàghere una cosa de custa genia? 

Sas cosas andant fatas cun cussèntzia pro resurtare bene, s'istùdiant, si analizant e a posca si ponent in pràtica.

Prus a prestu s'est faeddadu de unu curretore ortogràficu e de unu ditzionàriu, custas sunt chistiones de prus manna urgèntzia, ca si devimus iscrìere totu cantos a una liga, tando unu ditzionàriu chi siat unu puntu firmu servit a totu sos operadores.....

Sa chistiones sunt medas e difìtziles.

Su Presidente Soru at fatu una promissa e cada promissa est dèpidu, nos at promissu un àtera lege, e tando isetamus, in su fratempus sighimus cun su traballu nostru, a bellu a bellu si b'at sa bolontade sas cosas andant a dae in antis. Mi àuguro chi de adòvios comente custu nde organizent àteros, pro chircare paris cun su cunfrontu e s'iscàmbiu de bideas de acontzare sas cosas e de las megiorare.

Un ùrtima cosa, su adòviu in sustàntzia fit organizadu dae s'Ass. Reg. a sa cultura Mòngiu, pro faeddare de sa die de sa Sardigna, ma de custu pagu si nde at faeddadu e tando una bidea diat èssere cussa de fàghere propaganda e de fàghere connòschere mègius sas bideas nostras e mescamente fàghere connòschere a totu sos sardos sa limba sarda comuna ca a dolu mannu b'at galu meda gente chi no ischit mancu ite est, àteros pensant chi siat una limba imposta de chistionare a su postu de sa pròpia bariedade. E tando custa diat pòdere èssere una bidea a pustis s'at a bìdere.

Bonu traballu a totu cantos dae Duarche Antonella Licheri