Salude! Custu mangianu mi seo lèghida s'artìculu in ue si faeddat de comente andent sas cosas in Frìuli, a pustis mi seo documentada e duncas apo iscobertu chi su Master chi preparat pessonas chi potzant insignare friulanu est sèriu meda, sa prima cosa est chi su master no est abertu a cale si siat pessona, ma solu a chi giai tenet unu tzertu tipu de preparatzione, umanìstica, si narat gai. A pustis si dimandat sa connoschèntzia nessi orale de su friulanu, posca b'at de pigare in cunsideru sa durada de su master: sa bellesa de prus de annu e mesu, pro èssere pretzisos 21 meses de letziones de limba friulana cun letziones frontales e de laboratòriu, e a sa fine su costu! 

A l'ischides cantu costat custu master a unu chi nde tenet gana de imparare? Sa mòdica tzifra de 250 euro, prus 2 marcas de bullu, una pro sa dimanda e s'àtera pro ritirare su tìtutlu e custu ca b'at s'ARLES, chi est s'agentzia regionale chi finantziat custa bella initziativa. Sas dimandas de iscritzione si presentant e posca benint analizadas e valutadas ca no est chi si pigat chie si siat, custu chi siat craru, imaginade ite nde podet bessire a campu a pustis de 21 meses de master, pessonas de a beru in gradu de pòdere insegnare a sa gente su friulanu, pessonas prontas a semenare limba, ma a semenare cun cussèntzia e professionalidade.

Como deo non chèrgio fàghere s'ainu contràriu ma mi dimando proite in Sardigna ocasiones de su genere pro nois non bi sunt mai? Deo unu master l'apo fatu, m'est costadu cuasi a tres bortas de custu, e comente durada cuasi mancu sa de 5 partes..Non chèrgio ruspire in su piatu in ue apo e seo mandighende, apo imparadu meda ma siguramente non cantu si deviat. Mi dimando ma proite in Frìuli sunt gasi a dae in antis???? Ca forsis b'at gente cun una cussèntzia prus manna, ca forsis su dinare non benit ampuladu gai a su bentu. Forsis sos friulanos, totus, tenent una diversa bidea de sa limba issoro e una cussèntzia chi lis permit de l'amare, de la chistionare e de la contivizare. In Sardigna si intendent petzi bellas paràulas, a nàrrere semus totu bonos, ma a sa fine (podet dare chi mi isbàllie) ses faghende pagu e nudda. Cantos operadores de limba bi sunt in s'ìsula sarda? Deo nde connosco 4, totu unu mègius de s'àteru, forsis su problema est chi non semus aunidos....Diat èssere ora de faghere carchi cosa, est inùtile chi su dinare bi siat cando no est ischidu ispèndere. No est su dinare chi faghet sa cosa ma sa gente.

Proite unu cursu o unu master comente su chi faghent in Frìuli non lu faghent finas de a nois? Isco chi in Casteddu bi nde at unu ma a sa fine de sardu apo intesu chi non si narat mancu una paràula, no isco si siat una fàula ma si gai esserat est de rìere o forsis de prànghere.

Proite cun sas duas leges chi bi sunt si diat dèvere imparare su sardu in iscola e imbetzes non bi nde at mancu s'umbra???
Sa limba sarda a pagu a pagu est morende, sos giòvanos chi la chistionant sunt pagos, e meda pitzinnos mancu la cumprendent, sa chirca de Casteddu presentada in Paule forsis narat chi sa cosa est a s'imbèssere ma a mie non mi paret chi sia gasi...

E tando diat èssere ora de semenare bene pro regòllere ma si sighimus gosi non de semenare mancu amus a ischire prus ite semenare.
Dae Duarche, Antonella un operadora chi su sardu lu diat chèrrere prus biu e non moribundu comente est!


Antonella Licheri