De sos resultados de custas ùrtimas eletziones polìticas ite nd'at a costare pro sa chistione de sas limbas de minoria italianas? Podimus nàrrere chi forsis no at a cambiare meda, ma semper in s'ispera de èssere ismentidos. Sa prima cosa chi si podet nàrrere est chi in realidade, foras de s'aparèntzia, prus chi non Berlusconi ant bintu Bossi e sa Lega. Su podere mannu chi at balangiadu custu partidu federalista in sos echilìbrios de guvernu diat pòdere lassare ispàtziu a sas istàntzias de sas minorias. Ma a su matessi tempus, sende chi sa Lega non fundat sa batalla polìtica sua in una chistione natzionale o linguìstica ma fiscale, si podet dare chi, comente est costadu in passadu, non lasset tretu meda a sas minorias linguìsticas de cale si siat logu de s'Itàlia. 



Est capitadu finas in su 2006. Sa Carta Europea de sas Limbas non fiat colada in parlamentu ca sa Lega li aiat negadu s'apògiu pro more chi cheriat finas su venetu comente limba reconnota. Unu masione impossìbile ca su venetu no est in intro de sas limbas numenadas dae sa lege 482 de su 99. S'impasse chi nde fiat cunsighidu a custas positziones aiat burradu sa possibilidade de aprovare sa Carta chi galu est gasi sena aprovatzione. De seguru però sos votos chi at leadu sa Lega, paris cun cuddos pigados dae su Movimentu Autonomista de Lombardo in Sitzìlia, amostrant chi in Itàlia b'at gana meda galu de un'Istadu diferente prus federalista e prus autonomista. 



Finas su fatu chi su PD est andadu mègius in Sardigna, in ue su Presidente Renato Soru est resessidu a fàghere una polìtica prus autonomista e identitària de àteros, podet cumbìnchere de custu fatu.



Sa Manca italiana, dae Veltroni a Prodi a D'Alema, in tames custu fatu non l'at galu cumpresu e, finas in campagna eletorale, at sighidu a persighire s'idea e su disinnu polìticu de unu mollu de Istadu de s'Otighentos, tzentralista, istatalista, natzionalista, fatu totu de carabineris, giuighes, tricolore e innu natzionale. Forsis finas cando a sa gente comuna chi non resesset a lòmpere a sa fine de su mese, pagu nde nd'afutit de custa retòrica italianista. Sa Lega, in tames, at interpretadu pròpiu custu sentidu e at bintu. Amus a bìdere. 



Sos provedimentos de sighire in Parlamentu e in su Guvernu nou sunt s'aprovatzione de sa Carta Europea de sas Limbas, s'afortiamentu de sa 482/99 e su reconnoschimentu dadu dae sa RAI a sardu e friulanu pro sa presèntzia issoro in sas produtziones radiotelevisivas. Tocat a bìdere chie at a andare a su Ministeru de sos Afares Regionales pro ghiare su setore de sas minorias linguìsticas chi presedit a sos finantziamentos de sa 482. 



In totu custu cumboju andat sinnalada sa derrota, chi nemos s'isetaiat, de Illy in Friuli Venètzia Giulia. Leonardo Tondo, unu friulanu de Fortza Itàlia, l'at superadu de unos cantos puntos pertzentuales mancari sa Lega etotu apat amitidu prus de una borta chi aiat guvernadu bene. E finas totu sos sondàgios e totu sas previsiones prenataiant a Illy comente binchidore seguru. Lastima pro un'òmine chi ischiat guvernare e chi aiat fatu aprovare una lege bella meda pro sa protetzione de sa limba friulana. 



At a tocare a fàghere sos cumplimentos a su guvernu Prodi chi, giai dimissionadu e in campagna eletorale, at tentu su coràgiu de impugnare sa lege friulana a in antis de sa Corte Costitutzionale sabotende su mègius guvernadore chi teniat. Cando su masochismu de sa Manca italiana idolatra de s'istadu giacobinu non tenet perunu lìmite...