S’annu 2008 est pro s’ONU s’annu de sas limbas de minoria. In Sardigna pro sa Die de su pòpulu sardu s’at a festare unu de sos sinnos chi lu distinghent in s’identidade sua profunda: sa limba nadia. Sa Die de sa Sardigna est duncas dedicada ocannu a sa limba sarda, a totu sa richesa sua e de sas variedades e impreende sas normas de riferimentu in s’iscritura chi bellagasi s’Amministratzione regionale at impitadu punnende a una limba sarda comuna e a s’ufitzialidade. Normas de riferimentu chi ant cunsentidu a sa Regione sarda, a pustis de annos e annos de cuntierras bitzas, lunàdigas e sicàrgias, de impreare a costàgiu de s’italianu sa limba de su pòpulu suo, de sa gente sua. Pro custu acante a sa delibera in limba italiana immoe si podet lèghere fintzas cussa in limba sarda: una incambionada, unu passu mannu a in antis pro nche essire dae cussa chi est pro medas una faina simbòlica. Sa Regione sarda s’est incarrerada cara a s’ufitzialidade e credet in una limba sarda comuna pro sos tzitadinos cun s’impreu sighidu de bortaduras in limba de delìberas e de parte de su giassu istitutzionale suo, istituende su “Ufìtziu de sa limba sarda” regionale e promovende cunvegnos e seminàrios de livellu internatzionale. Pro sa Die de sa Sardigna b’ant a èssere àteros messàgios istitutzionales in sardu e una festa manna in cada provìntzia. Cun sa limba ufitziale si cumentzat unu tempus nou isbetende cun aficu chi sa Die de su pòpulu sardu istrinet a
totus unu benidore fintzas in limba sarda.
delìbera in sardu
http://www.regione.sardegna.it/documenti/1_170_20080401175055.pdf
delìbera in italianu
http://www.regione.sardegna.it/documenti/1_73_20080401131533.pdf
àteros ligòngios de sa polìtica
linguìstica de sa Regione Sarda
|