Paret una cosa gasi, de sensu finas iscontadu. Chie su sardu non l'ischit nessi non diat dèpere mancu pensare de traballare in sa polìtica linguìstica. E puru in sa Sardigna maca de custos annos custu no est unu datu achiridu in totu. B'at pensadu Renato Soru, in s'adòbiu de sos ufìtzios linguìsticos de s'àtera die in Casteddu, a pesare sa chistione a manera sua. 



At atzantaradu una pitzinna de unu sòtziu finas cumpetente ca fiat faeddende in italianu pustis chi totus aiant faeddadu in sardu in pùblicu. S'est finas iscusadu su Presidente de custa aconcada chi podet pàrrere pagu dìliga, ma in realidade, comente a fitianu li capitat, at sebestadu in su giustu e in su pretzisu. Forsis petzi in Sardigna di fatis amus situatziones chi diant pàrrere foras de tinu in cale si siat àtera minoria europea. In sa chistione de sa limba, finas pro ca sa lege regionale 26 de su 97 non fiat adeguada pro nudda, amus apidu su fallimentu de sa veicolaridade. S'est faeddadu meda de sardu, pro e contras, ma pagu in sardu. E a bias chie prus pagu ischiat su sardu prus at chertu nàrrere sa sua in cosas chi no teniat mancu a pràticu. Unu machìmine chi solu nois podiamus bajulare. 



Dae pagos annos s'est annanta sa costuma lègia e mala chi sas amministratziones comunales ant leadu a traballare in sos ufìtzios linguìsticos gente chi non resesset a faeddare in sardu. Proite? Ca no ant bidu s'ocasione pro fàghere cultura e educatzione linguìstica in sa bidda issoro, ma petzi sa possibilidade de dare unu istipendieddu a unu giòvanu de sa bidda, a unu parente o a unu eletore. Si posca non faeddat in sardu, ite li faghet? Podet semper agiudare sos impiegados a fàghere fotocòpias...Pro non nàrrere de sos acadèmicos e intelletuales chi a parusu sunt intervenende in mèdios e in sas letziones issoro semper contra a sa limba, pro disfamiare, disinformare, truncare unu pilu in bator e in oto cun sa punna de frenare e blocare su biulinguismu. Ca si andat in portu una polìtica linguìstica bera pro sa limba sunt sos pitzinnos de sos ufìtzios chi ant a leare tretu e traballu, mentres issos ite faghent? Pigant letziones dae nois? 



Su chi at naradu su Presidente de sa Regione tando cheret postu in contu pro megiorare sa polìtica linguìstica. Chie traballat in un'ufìtziu e no ischit su sardu faghet dannu a su sardu e a totu sos àteros operadores. Custos professores e intelletuales chi si la leant contra a sa Limba (comuna o no chi siat) faghent dannu a sa limba e sos chi in sa polìtica linguìstica bi credent e isperant de traballare. Est arribende su tempus chi sa cumpètentzia at a dèpere èssere tzertificada, e sena tzertificatzione nemos at a pòdere traballare o leare incarrigos pro sa limba. Sos àteros: o imparant o faghent àteru. O ant a tènnere sa cara manna de nos imputare chi faghimus discriminatziones ca rechedimus sa connoschèntzia ativa e passiva de sa limba pro traballare in polìtica linguìstica? 



Pro non nàrrere de chi lu faeddat a manera istrumentale, ma pro blocare mègius s'ufitzialidade. Ma custas sunt formas de pervertimentu chi amus a bìdere àteras bias. Si unu faghet s'idràulicu, depet connòschere ite est faghende. Semus nois sos martzianos o sunt issos? Denuntziade sos operadores chi non faeddant in sardu, in beridade sunt furende su traballu chi ispetat a un'àteru.