Si intitulat "Dona Mallena" su romanzu nou in limba sarda de Larentu Pusceddu. Est unu contu ambientadu in sa Sardigna de s'Otighentos chi publicat s'editore Condaghes in sa canaca "Paberiles", sa prus interessante e costante initziativa literària sarda de sos ùrtimos annos. S'intritzu disinnadu dae Pusceddu, chi est su primu chi at publicadu unu romanzu in sardu cun "S'arvore de sos tzinesos", cumintzat in su beranu de su 1866. 

Alfredo Bruni, atendente de Garibaldi, adòbiat in Nùgoro a dona Mallena, fìgia ùnica de don Andria Pirisi, su proprietàriu prus ricu de Oros. Naschit tra issos un’amore mannu, chi si faghet prus forte in sas traschias sotziales de sos annos: sas carestias, su tilipirche, sa luta de “su connotu”. Cando Alfredo torrat in gherra contra a sos papalinos e frantzesos, a dona Mallena che li furat sa puresa dotor Canete, su mèigu de Oros. A coa de pagus tempus sa tzeraca, tzia Remunda Gravellu, l’agatat in unu lagu de sàmbene. 

L’aiant pigadu a istocadas e crastadu. Istrintu in manos, su mortu giughiat un’ispillone de prata. Tzia Remunda, cumbinta chi fiat de una proprietària, at chircadu de ricatare a dona Pepa, sa mama de dona Mallena. No essènde-bi resessida, intregat s’ispillone a su marisciallu Matiu Serra. Pustis de sa morte de tzia Remunda, sos suspetos de su marisciallu cumbinchent su procuradore Bore Marrocu e s’acusadore Antoni Delussu a arrestare a dona Pepa. Don Andria Pirisi ponet s’avocadu Sisi Capiddu pro difèndere sa mugere.

Larentu Pusceddu est nàschidu in Oroteddi (NU) in su 1947. Diplomadu in Agrària, est dirigente sindacale de sa CGIL in Siniscola inue istat dae su 1973 cun mugere e duos fìgios. At collaboradu cun giornales e televisiones: Sardigna, Natzione Sarda, La Nuova Sardegna e Telesardegna. L’ant dadu riconnoschimentos in prèmios literàrios: Città di Ozieri, Meilogu, Romàngia, Bonorva, Macumere, Durgale, Oroteddi, Nùgoro, Mamojada, Casteddu, Pasada, Ossi, Mores, etc.

At pubblicadu: Dae s’umbra de s’ístoria (LP); sos romanzos "S’àrvore de sos Tzinesos", "Mastru Taras", "Su belu de sa bonaura"; "Pipinidas e iscazas" (contos pro feduliu). Prémiu "Casteddu de sa Fae" - 2006.