Est beridadi: s’arti est s’atu de acrobai is contràrius ingenerendi unu novum chi andat addia meda de sa suma de is elementus postus impari.



In sa pintura de s’artista de Nurri - chi amostat is traballus suus in sa Vetreria de Pirri, de su 3-04 a su 14-04, ore 10/13 – 17/20 bogau su lunis – luxi e scuriori, tzérriu e citiri, nascimentu e morti, passau e benidori, andant addia de issus etotu contendi sa tribulia de una realidadi chi si fait spera própiu po su scioberu de s’artista de dda contai cun totu is scontrórius de s’anima turmentada e aperdada de sa terra sua.



Deu, poeta (aici nànt), stentu a cumprendi is fueddus mudus chi circant de si fai contu essendindi de cussas telas. Ma in su mentris chi seu allutendi is origas, - po s’avesu chi donnia sentidu pighit passu e fatzat tretu po mediu de is fueddus – m’intendu aundai is ogus, su coru e is furrungonis de s’intrannia de su contu chi, in is pinturas de Piero Ligas, si fait forma, colori e ndi essit, e benit a t’atopai. No abetat, firmu, chi tui apas furriau s’oghiada, ma ti tzérriat e si furriat a essi tui etotu chi t’acostas e càstias, poita ti stat contendi su chi ses, su chi ses stétiu, su chi as a essi.



Est una circa tostada e sentza de lacanas stilisticas aprioristicas su traballu de Piero. 



S’assessori a sa Cultura de su Comunu de Casteddu, Giorgio Pellegrini, chi at inaugurau s’amosta, s’est nau cuntentu meda de biri arti aundi su traballu de s’artista est una circa úmili - po cantu atrévia - de sinnificaus e de valoris, e no atributzioni artificiosa de sinnificau a cosas chi no ndi tenint, poita no piscant in s’arcivu interiori de s’artista e in s’identidadi sua.

Mi firmu, spantada, ananti de una pintura strinta e arta, chi amostat unu niu de perdas prenu de pilloneddus asulus e, apitzus, sa mama de is pilloneddus chi, a alas de perda, cirdinas e allonghiadas, circat de si pesai e parit giai giai chi nci arrennèsciat.



E deu – poeta recidivu – seu totu in d-una pilloneddu asulu a conchixedda pesada, is alixeddas de perda tremi tremi, abetendi s’imparu (po ponni a proa is alas/ atesu de umbras malas/ de astori...).



Est unu tzérriu chi mi truessat s’anima, una luxi arrepentina.



Fradis chi mi ligeis, sa Sardinnia est deaderus una “Terra de su Possibili”. Nci depeus crei cun totu sa forza nosta. Mancai a alas de perda (o fotzis própiu po mori de cussas – “Paiono traversie” scriiat Giulio Angioni, “e sono opportunità”), su bólidu de s’ànima nosta de sardus, candu s’at a pesai, at a essi prus artu.

Deu no creu chi siat sceti unu bisu sentza de fundóriu.

E nemancu Piero Ligas - ndi seu sigura - ddu creit.