Sa limba tzimbra, faeddada in Luserna, at in fines sa grammàtica sua. Cumposta dae s'Istitutu culturale tzimbru de Luserna e dae sa Regione Trentinu-Alto Adige/Sud Tirol, s'òpera est istada presentada carchi die como, presentes sos autores, dae s'assessore regionale Luisi Chiocchetti e dae sa presidenta de su Kulturinstitut Anna Maria Trenti Kaufman. 

Su traballu iscientìficu prus mannu l'at fatu Luca Panieri, catedràticu de s'Universidade IULM de Milanu, chi at ispricadu chi su volùmine podet èssere unu puntu de ghia e riferimentu pro totus cussos chi cherent impreare su tzimbru in s'iscritura e in sas iscolas. Sa presidenta de su Kulturinstitut at ammentadu chi sa grammàtica fiat s'obietivu prus de importu pro su sòtziu suo nàschidu duos anno como. 

<Una limba - at naradu Anna Maria Trenti- pro èssere cussiderada tale depet èssere istandardizada e duncas depet tènnere unu còdighe de iscritura e regulas de grammàtica usadas dae sos faeddadores>. Unu simple printzìpiu chi in Sardigna no ischint mancu sos chi leant detzisiones de polìtica linguìstica, mancari faeddent in su sardu issoro e los apant cumbintos de èssere bravos. No est una pena custa?