Est de seguru una cosa pretzisa chi s'universidade de Casteddu publichet in su situ telemàticu suo tesi de dischentes chi ant fatu cursos chi in teoria diant dèpent èssere de sardu e posca si iscoberint chi sunt de àteru. Sos professores de custos masters difatis no l'ischint faeddare sa limba nostra e in prus faghent propaganda a bias contras a sa limba e s'identidade sarda matessi, a bias contras a s'istandard regionale. 

Postu chi ognunu la podet pensare comente bolet e chi sa libertade est una conchista de sa tzivilidade, est dignu pro s'ateneu casteddàrgiu isprecare gasi su dinare de sos contribuentes? Andat bene criticare totu, mescamente sa Lsc ca est solu una proposta isperimentale in essida de sa Regione chi serbit a traduire calicunu atu burocràticu. Ma chi professores titulares e ordinàrios de s'Universidade de Casteddu pòngiant sa firma insoro comente relatores in tesis inue si proponet de iscrìere in sardu "cumpudu" pro tradùere su tèrmine "analisi" est iscandulosu de a beru. 

E in prus nende chi b'est in suta unu metodu iscientìficu bogadu de sa professione de mèigu. Ma si unu babbu mandat sa fìgia sua a unu mèigu e li narat de la "cumpudare" in tames de li fàghere sas analisis (comente nant totu sos sardos e comente est pretzisu pro sa terminologia internatzionale) ite nde essit a fora? Roba de bufonerias in tzilleri e de maleducados de aberu. Ma sa curpa no est de chie iscriet, ca no est de su mestieri e si podet cumprèndere chi potzat faddire (ma persersevare diabolicum est). Est de custos acadèmicos chi no ischint galu su sardu posca chi lu istudiant dae una vida.

E ponent sa firma insoro in fainas ruinadoras chi no ant nudda de iscientìficu e sunt pagadas (meda) dae sas leges de sa limba. Posca custa gente, cun su tìtulu de s'universidade in busciaca, si bisat a beru de èssere esperta, antzis "sperta". Su dannu chi faghent a fùrriu est suta de sos ogros de totus. Diat èssere ora de l'acabare, o professò, s'induncas calicunu si nde acatat e posca su grifone si isciutat.