Est andada bene sa presentada aparitzada dae sa Biblioteca de sa Comuna de Abas is sa Domo de Su Parcu de Santa Maria. Apustis de su saludu de su sìndigu Emanuele Trudu e s’interventu de su moderadore Massimo Pistis chi at letu partes de su libru, Nicola Cantalupo at presentadu su traballu de Micheli Ladu "S’àrvule de sos sardos" imprentadu dae sa domo de imprenta Condaghes in sa collana Paberiles, cun un’anàlisi istòriga funduda e làdina de su tempus giudicale chi passat peri totu su libru. Apustis s’autore de su libru at ammentadu sa dificultade chi podet passare sa literadura e sos autores etotu chi la faghent sena tènnere un’indicu ortogràficu craru. Interventos de importu mannu cussu de Pepe Corongiu chi at mostradu su vìtziu de s’istadu italianu de èssere europeista cando li cumbenit (bidu chi in Italia no est istada galu ratificada sa carta europea de sas limbas) e cussu de su cunsigieri regionale de Rifondatzione Paolo Pisu chi at fatu denotare, e faeddende in sardu comente a totus sos àteros, s’importàntzia de sa limba pro sa Sardigna e sa gente sua in tempos de globalizatzione.