No est semper chi s’iscrient artìculos pro bantare una pessone. Ma sa pessone in argumentu e su fatu chi li pertocat lu meressent. Sa pessone est Paolo Pisu, consigeri regionale comunista, chi consideramus dae sempre unu difensore e unu praticante ativu de sa limba sarda. Su fatu, finidu in sos giornales, est chi, posca de una cuntierra pro chie deviat istrangiare una tribù rom bogada dae Terralba, at detzisu de ospitare in domo sua in Làconi una famìlia de sos chi sa gente li narat “zìngaros”.

Assempru de coerèntzia umana, politica e tzivile. Pisu est istadu unu grandòmine a seberare su chi at seberadu. Primu ca sos gasi narados “zìngaros” chi diant èssere, segundu sa limba issoro, o Rom o Sinti o Caminantes, fiant sena domo e no aiant mancu una cobertura o un’amparu. Segundu ca, in mesu de custos b’at pitzinnos, fèminas e sèneghes, chi lassare a giru comente cheriat fàghere su sìndigu de Terralba no est pròpiu pòssibile in una natzione tzivile comente s’isperat sia sa Sardigna.

Tertzu, e isperamus non ùrtimu, sos Rom, Sinti o Caminantes, sunt minorias linguìsticas protègidas dae s’Unione Europea chi s’Itàlia, e medas de nois, sighint a ignorare. Imbetzes diat èssere pretzisu, e Pisu l’at fatu, a sighire finas sas chistiones de custas minorias pagu connotas e apretziadas. S’Europa at finas fatu reclamos ufitziales a s’Itàlia pro su fatu chi no esistit mancu una lege chi tutelat sa limba de sos “zìngaros”. 

Paolo Pisu, esponente finas de su movimentu linguìsticu, de presidente de sa cummissione deretos tziviles de su Consìgiu regionale, at iscritu a reghente unu libru subra comente si bivet male in sas presones italianas e sardas. Sa sua est una atividade polìtica semper serente a sos interessos de sos ùmiles, pòberos e dèbiles. Coerèntzia in totu, finas in sa protzetzione non petzi de sa minoria linguìstica nostra, ma de sas àteras. De totus. Finas cussas prus iscomodas comente cussa nòmade chi istrobant sa cuscèntzia de sos benpensantes.