Caru Cristianu, ti torro gratzias pro m’aer mentovadu. Deo a s’elencu tou cherio ponner puru Antonella Licheri de Duarche e Gianfranca Piras de Iscanu- Montresta. Ma m’at a piagher in custa battalla manna, d’aer a costazzu Zuliu Pala de Trennuraghes, ca est un amigu, unu frade, mancari sa “differentes bisiones” subra meda argumentos subra de sa limba sarda. Ma da “mastru saldu de limba sarda”, soe siguru chi issu puru at a narrer sa sua in custas chistiones!



Custa gherra limbistica, chi no semus accatados a combattere no l’amus crefida nois. Nos sunt attacchende in d’onni manera…. Issos ne tenent de armas mannas: dinari, tzornales, sos media prus importantes! Ma nois comente ischis tue e sos ateros operadorades tenimus sa fide. Sa fide limbistica!



Est beru su chi naras. In s’iscola nos ant fattu unu dannu mannu! Est ora de nos pesare e abbocchinare chi semus omines liberos ! Deo puru, comente totta sa “generatzione nostra” soe istadu “secuestradu” dae s’Iscola italiana! Mi l’ammento bene sa mastra “Borbonica”, bennida dae Napule, chi naraiat a sos cumpanzos meos: “Mo’ basta!” Mi l’ammento sa matessi mastra chi naraiat a carchi cumpanzu meu:“sei tonto come una pecora, stai seduto come un pastore…”

E gasi….



Deo soe creschidu in d’unu ambiente “bilingue”, ca babbu est de Iscanu e de Sagama (e faeddat su logudoresu) e mama est de Mara Arbarei (italianamente Villamar e faeddat su campidanesu de sa Marmidda e de sa Trexenta!). A sett’annos soe arribadu in Sindia. Inoghe apo imparadu (male, pro carchi amigu… ) su sindiesu (e no apo leadu s’acentu!). Apo imparadu a freddare in sardu no solu cun babbu e mama, ma dae sos cumpanzos, dae sos anzianos de carrela, in sas buttegas, in sos tzilleris….



Pustis, s’Italica Iscola, m’at cunditzionadu: soe andadu a istudiare in Bosa e sa limba bosinca mi pariat una brulla…..ma no fuit gai! In sos annos de Universiade in Tattari, sa Limba, est diventada sa limba de “reciproca connoschentzia”….o menzus pro lu narrer “veicolare”, ca nos pirmittiat de nos “ponner a contu nostru” cun sos ateros….(tattaresos, gadduresos, ecc……

Apo tentu unu cumpanzu de domo de Bitti ( o de Gorofai…comente naraiant po rier sos cumpanzos suos “bitteses” ).



Apo dadu meda esames subra “sa limba e sa cultura sarda”, ca deo tenio s’indiritzu “Filologico- Sardo” de su cursu de laurea in Litteras; mi soe laureadu cun d’una tesi subra sos numenes (lumenes in sindiesu) de logu de Sagama, Sindia e de sa Pranarza (o Pienarza o Pienalza). Apo dadu unua manna cuantidade de sos esames in italianu….mesu in italianu e sardu (cun su Prof. Tanda) e in sardu cun sos professores Micheli Pinna e Diegu Corraine.



Cando bi penso, m’intendo male….ma si semus adurados e amus finidu cussu cursu, l’amus fattu, ca nos as permissu de nos connoscher ( e de nos reconnoscher), a intro de sa “macchina trittasardu” de s’Universidade. Cursu de Limba e Cultura Sarda…. Ohi pobera limba! Crebada! Finas letziones de Grecu! Apo partetzipadu a sa chirca sotzio-limbistica e apo fattu sas intervistas in Bosa e Tinnura, no apo elaboradu deo, sos risultados, ma da limbista, aiat tentu carchi duda, subra calicuna dimanda…. Ma sa zente, aiat respustu in cuantidade manna, chi cheriat sa possibilitade de faeddare in sardu, cando cheriat, in d’onni cuntestu, in d’onni logu…..



Cale limba? Sa de bidda certu! Ma cale limba iscritta? Cheriant nurmas e regulas….Como sa LSC at donadu una resposta a custas preguntas, gai mi paret, o nono? Tenet ragione Bolognesi, iscriemus in d’una manera, gai nos cumprendimos tottu, ma letzimus e faeddamus in trechentos variantes, si cherimus!



E nois poberos operados? Cuntrattos Co.Co.Co. dinari pagu, passione meda! Ma tue l’ischis megius de a mie, chi pro mandigare bi cherent Euros! Cun sa passione, no si campat! Issos, sos Accademicos leant in d’unu mese, su chi nois leamus in d’unu annu!



Est giustu?

Nois devimus fagher ateros triballos…..

Est giustu ?

A l’ischis Cristianu, ite nos iscualifica ?

Ca mancari no semus pagos (duochentos ?), semus divisos in sas varias “fatziones”!

Semus tottus “Guelfos” e “Ghibellinos”!



Como est beninde s’ora de nos contare e andare innanti tottu paris, ca si no sas battallas ant a esser prenas de sambene e fele!

E sa gherra pro sa Limba la perdimus puru!

E si perdimus nois, perdet su popolu, ca nois, semus fizos o nepodes de massajos, de pastores, de ferreri…., de mastru de muru…..de mastru de linna…..



Sa gherra pro sa LSC, no est solu pro salvare custa limba “giuridica-isperimentale”,

no est solu pro nos parare su culu cun su triballu,

est una gherra pro fuliare a terra sa Domo Manna, de s’ipocrisia accademica….

L’ischimus bene, su chi cherent fagher dae semper:

faeddamus de limba sarda, ma non in limba sarda…

Cherent fagher diventare sa limba sarda (calicuna siat) comente sa mama sua…..

Balet a narrer sa Limba Latina chi est morta!



Accabo custu articulu-littera a Cristianu, nende a tottu su chi sighint e letzent custu blog (o zassu, o chizzone….) de narrer su chi n’de pensant.

Tenides presente, chi no devimus difendere solu su sindiesu, s’iscanesu, su sagamesu, s’otieresu….ma totta sa Limba Sarda!



MARIEDDU SANNA



http://ulsdesacomunadesindianu.myblog.it/