Sa Comuna de Làconi, cun s'agiudu in dinari de sa Presidèntzia de su Consìgiu de sos Ministros e de sa Regione Autònoma de Sardigna
at organizadu pro su 24 de su mese de austu una die de istùdios e cunfrontu pro operadores e interessados a sa chistione de sa limba.
Su tìtulu desvelat giai ca no est su cunvegnu chi si faghet a parusu tantu pro lu fàghere. <Limba sarda comuna: un'ocasione de traballu
o una batalla "simbòlica"?> ant postu sos organizadores comente tema matanosu ma finas acisadore. 

S'initziativa si presentat comente unu seminàriu de autoformatzione pro operadores de sa polìtica linguìstica finantziadu dae sa lege 482/1999
ma, in realidade, podet èssere abertu finas a cuddos chi sunt appassionados ebbia, a polìticos, a funtzionàrios de comunas e provìntzias
o finas a cumponentes de sòtzios o istitutos culturales.

De seguru unu apuntamentu de non pèrdere pro chie traballat in cale chi siat ufìtziu linguìsticu de totu sa Sardigna e isperat de podet sighire a
traballare si sos entes prepostos sighint a investire dinari in sa polìtica linguìstica. E mescamente si si resesset a colare dae una fase
simbòlica (gestida prus che àteru dae sos dopolavoristas volontàrios) a una prus organizada e professionale gestida dae professionistas
de sa limba postos in contu e pagados comente si depet. 

Sos relatores sunt de sos mègius comente cussèntzia polìticu-linguìstica chi b'at como in Sardigna intre giovanos e mannos de sa polìtica linguìstica. 

Pepe Coròngiu at a faeddare de limba, dialetos e problemas aplicativos de sa lsc in tradutziones giurìdicas e sagìsticas, Roberto Bolognesi at a aprofundire sos datos giai presentados in Paulilatino, Alessandro Mongili sos datos de sa Chirca sotziolinguìstica relativos a s'istandardizatzione, Pàulu Pillonca limba e sonos. Micheli Ladu at a presentare sa lsc, Cristiano Becciu problemas terminològicos de sa lsc, Michele Pinna sos problemas de sos isportellos linguìsticos de sa parte de Tàtari gasi 
comente Tore Cubeddu pro sa provìntzia de Aristanis e Maria Antonietta Piga pro Nùgoro. 

Ma no at a mancare su dibàtitu polìticu giai chi est girende s'idea de istruturare mègius su movimentu linguìsticu. 

Fausto Fulghesu, sìndigu, Marco Meloni, isportellista lacunesu, e Luca Murgia, funtzionàriu comunale, ant traballadu meda in custa purrata de mesu austu pro
pòdere lòmpere su 24 a una die de istùdios friscos in una bidda bella e prena de abba e padentes. Cun 15 euros ebbia si podet mandigare in s'Oasi de sos paras
caputzinos cun unu menù dignu. 

Chie leget est cumbidadu a partetzipare, ma est mègius si in antis s'iscriet. 





<Limba sarda comuna: un'ocasione de traballu o una batalla "simbòlica"?>



Làconi (OR), 24 Austu 2007 - Tzentru culturale comunale -

H. 9.30 - 13.00 – Formatzione operadores 

H. 15.00 - 19.30 – Formatzione operadores - Dibàtitu pùblicu


Intervenint: 



Cristiano Becciu - Ufìtziu regionale de sa limba

Roberto Bolognesi - Universidade de Amsterdam

Pepe Coròngiu - Consulente RAS - Presidente Sòtziu Limba Sarda

Tore Cubeddu - Ufìtziu Provintziale Aristanis

Micheli Ladu - Ufìtziu regionale de sa limba

Alessandro Mongili - Universidade de Casteddu 

Maria Antonietta Piga - Ufìtziu Provintziale Nùgoro

Micheli Pinna - Diretore Istitutu Bellieni Tàtari 

Paolo Pillonca - Diretore rivista Làcanas





Ant a èssere presentes:

Autoridades polìticas de sa RAS e de sa Provìntzia de Aristanis





Pro partetzipare a sa formazione non si depet pagare, est pretzisu a si marcare telefonende a s’Ufìtziu de sa Limba sarda de sa Comuna a su nùmeru 0782869102 o 3462130214.




Sa segreteria at a frunire a sos partetzipantes materiales didàticos (libros de Bolognesi, Pillonca, Corongiu) e a chie lu pedit unu tzertificadu de partetzipatzione.




A merie su dibàtitu est abertu a totus. 



Pro chircare a drommire su fine de chida 

www.laconi.it 

http://www.bed-and-breakfast.it/pagina.cfm?ID=9414

http://www.albergosardegna.it/


Pro mandigare 

Pizzeria "Su Stunnu" Via Verdi Tel. 0782869818


Ristorante Paradiso via Crimenti, 5, Tel & Fax: +39 0782.869445