Deos gratzias! Tocat a narrer cando s’intendent notissias chi s’isbetavant dae tempus, mancari chi Deus tenet pagu ite apitzigare cun custa. A b’intrare in custa chistione est intamas sa ICANN, Internet Corporation for Assigned Names and Numers s’organizatzione chi donat sos deretos po istupare in sa retza cun d-unu dominiu novu, chi at dae pagu atzetadu cussu presentadu dae sos catalanos. Duncas su dominiu “.cat” intr’e pagu tempus, s’annu chi intrat si pessat, at a esser presente in sa retza po sa cuntentesa de totus sos catalanos chi dae tempus batallavant po custa cosa. Sunt bastadas 68miza firmas intre impresas e pessones po fagher intendere sos deritos de unu populu in d-una dimanda presentada su 16 de marthu de su 2004.
Ma sas peleas no ant istentau a bennere.
A una banda sos cunservatores de s’istadu ispanniolu ant inzurzau a Zapatero de esser unu mani-lascu ca depiat cumandare a su mancu de ponner “.cat .es” gai de inditare siat sa natzione catalana chi s’istadu ispanniolu.
A s’atera banda galu peus at fatu su guvernu de Valencia chi at briadu su Primu Ministru sotzialista ca at fatu sa Catalunya culturalmente indipendente dae s’Ispannia e cheret como presentare su dominiu “.val” po parisare sos contos cun Bartzellona. Sos de Bartellona dae parte issoro ant decraradu chi “.cat” no inditat unu territoriu, unu tretu de terra, ma una realidade culturale cun Valencia e sas Baleares.
E custu unu pagu faghet pessare: ma sa Sardinna nostra carchi die l’at a tenner unu dominiu suo “.sar”? O fortzis nos amus a acuntentare de “.sar .it”? O amus a briare po “.log” (logudoresu) e “.cam” (campidanesu) e “.gad” (gadduresu) fintzas de arribbare a “.org”(orgosolo?). Traballu a s’ICANN nde l’amus a dare e po como, isbetande de tenner fintzas nois unu reconnoschimentu culturale e limbisticu in su Mundu chi est sa retza, nos acuntentamus de unu prus simple e anonimu “.net”, chi est fintzas s’acronimu de “No Est Tempus”!
