Custa esti sa de tres faulaberus ca emu iscritu e pinnigadas po dhas fai
pubricai in su giorronali, su primu in Pauli, Pauli Pàginis. Dex'annus e
prus a oi, seu andau a sa redatzioni de su giorronali e dhis nau ki mi bòlianti
e pòdianti pubricai custus contixedhus, m'arrespùndinti 'Banda beni cumenti
a bidea, podeus fai una pàgini po is pipiedhus'. Deu perou, ita lastima,
no si dhemus donadas. Oi torradas in sardus si dhas ongu a po dhas fai ligi
a totus is abisitadoris de su giassu de sotziu limba.
Tenemu custu dillu in cùcuru de prus de un'ora, parìada ki m'infrisèssidi
is ciorbedhus: Ta-tarararara-ra-ta-ta'.a sighiri e sighìada. No arrennescemu
a cumprendi poita, e sa curiosidadi m'amanniada su disìgiu, poita no mi bolèssidi
lassai custa ispètzia de dillirillillera ki tenìada un ritmu, a bocidura
de is origas, amanniendisia .
Passilla, passilla, m'atòbiu cun unu piciocu, assumancu a mei mi parìada
aici, ki tenìada totu su corpus prenu de pilus longus longus, niedhus e totu
furriotus. Custu tenìada su nasu unu pagu strecau ca parìada no tenèssidi
càrigas; no tenemu meda in contu sa caminada isciamia-sciamia, ca cumenti
custu s'accostiada a ke mei dh'assimbillamu a is caminadas de is curridoris
de is ùrtimas ulimpiadas aregas.
Fìada istètia sèmpiri una tontesa, tostorruda, de mei, de castiai e compudai,
fintzas in manera sciambreca, totu e totus. Femu sèmpiri ingiriau de i cussa
dirillillera ca candu femus lòmpius a casi tres o cuatrus passus de atesu
s'unu de s'àteru, mi ndi seu atzicau. Seu abarrau incirdinau, tèteru, ke
alluau e abarrau a buca oberta.
Emu, cumenti a sèmpiri, e sciambrecamenti, castiau cosas e partigularis de
segunda e pagu importàntzia, de no mi ndh'essi acatau fintzas a cussu tretu,
perigulosu, ca custu giòvunu, ca cussu giòvunu no fudi unu giòvunu'''!!!
Ma cumenti'
Custu piciocu no fudi unu piciocu e nimancu tanti giòvunu, forsis. O ca
eya'
Mah, ita, perou' Agitòriu! No dhu sciu prus! Ma ca no esti nimancu
bistiu'!'
Esti totu piludu, totu piludu in sa carena, in su corpus. Esti meda piludu
ca in unu primu tempus mi fìada pàrtiu bistiu. Ma it'arratza de bistiri podìada
essi cussu ca fianta sceti pilus' Ma fintzas po essi pilus tenianta una stranesa,
fianta mesu cìrdinus e murrus a su colori. Po truncai fìanta is pilus de
sa pedhi, ma bera, e in pitzus de su meri cosa sua ca dh'ìada produxa in
pitzus de issu e totu. Ma castia unu pagu'!
Custa, imoi, custa cosa benìada ainnantis a ke mei, deretu, kene de fai biri,
a mei parìada de aici, de tenni pressi. S'atzìkidu eya, s'imprus
perou, kene
de timi diaderus. Sa kistioni fìada ca biendimia, issu no ìada illonghiau
su passu a-sa-manera-de-caminai-de-is-ulimpiadas-aregas.
M'ìada pigau un longu, ma longu, po mei si cumprèndidi, tanti de scimìngiu
cumenti candu sesi alliscinendi e arruis ke unu tontu, poita no nti ndi sesi
acatau ca festa arruendi sceti candu sesi bellu sterrinau a facci in terra.
Su dillirilleru beffianu, ki tenemu in cùcuru mi parìada, oimomia, ki èssidi
impressau su ritmu e mi stronèssidi totu is sentidus, amatucada su ritmu,
su sonu e su tonu; no dhu podemu abaliai o dhu fai acabai.
No femu timendi, gei mi dh'arregordu beni e ndi femu siguru de custa cosa,
ma m'intendia scimingiau, no arrennescemu de agatai calacuna cosa a ita
dh'assimbillai,
assumancu unu pagu pagu, de mei cun cussu, cun cussu innia, cussu giòvunu,
cudh'òmini, immoi no arrennèsciu e no sciu prus nimancu ita dhu tzerriai.
Sa musica macca de i custu dillirilleru maccu, sa caminada cosa sua, is pilus,
piludu, is tzudhas, ita'!' De sa pedhi!?' Aahhaaah!
Bènidi pròpiu contras de mei kene de nisciunu, aici mi pàridi, avolotu, preucupatzioni
o ita ndhi sciu, ameletzu contras de mei. Su cùcuru miu fìada unu furriotu
de sonus e pentzamentus, su corpus miu si tremìada, ma no femu timendi, fìada
poita no cumprendemu, no arrennescemu a cumprendi totu custas cosas. Su scimìngiu
fìada meda, m'intendemu, eya, is peis a pitzus de su nudha. De su sbuidu
a suta de is peis, donau de s'arrexoni sbuida, cancarada a cumprendi e prus
pagu a arregordai. Sbuidu, no mi podemu arrimai, totu infromigau.
Ecus! Eya! Nci seu, su it'esti, pròpiu cumenti a candu m'incraru in sa fentanedha
de s'aposentu miu ca bivu in is Cancelledhus, acanta de s'Abasciada de Carìcia
in sa pigada conca a sa Gruxi de Màrmuri de Pauli.
Cumenti ki no nci podemus fai nudha e torrai a ismasciai, s'acostiaus cumenti
a dua leturinas in su matessi binàriu e currendi a si stumbai a marolla.
Ci seus!. Dh'atòbiu, dhu tocu, 'Funti pilus!!' 'Kini ses''' Dhi nau casi
tzerriendi, illuegus, 'Aundi ses andendi' Deu mi nanta Mariedhu!?' Fatzu in
tempus a dhi nai totu kene de abetai ki m'arrispundessi, totu in d'unu sùlidu.
'Rrr, frtz, mnss, arrdt'.
Nooo'!' No esti possìbili. Custu', custu', custa cosa, custa mantinica no
fuèdhada cumenti a mei, a nosus òminis bollu nai. Antzis no fuèdhada pròpiu.
Bògada custus sùlidus, custas ki mi pàrinti sceti cumboxis, eya, cumboxis
ma kene boxalis. Sùlidus fortis, ki frìsianta in is murrus, longus ma pinnigaus
in sonus beni pratzius.
Ma cumenti' Cument'esti ki fuèdhada custu' Fuèdhada'! Kini esti'! 'Kini
sesi''
No esti bistiu, spullincu, tudau de i custas tzudhas, longas longas de..,
de.., de mantinica'!'
Oh no' Nci ndhi funti àterus, no meda atesu a de nosus duus, funti a casi
centu, centuxincuanta metrus prus innias, càstianta a innoi, a nosus duus,
antzis no, a mei; mi funti castiendi e si mòvinti issus purus po s'atobiai.
A m'atobiai.
No tènidi e no tengu timoria; no mi pàridi e no dh'intendu contras de mei.
Ma seu cumenti a pèrdiu, no tengu istibas, cosas ca cannòsciu. Tengu su scimìngiu,
ma su scimìngiu de s'arrexoni, de sa realidadi, de i cosas, de sa genti cannota
ki no arrecannòsciu in custus. Aundi seu immoi e innoi' Innoi esti totu birdi
de matas e de s'erba, totu ingìriu de mei esti birdi, ma de unu birdi allenu,
no seu a Pauli, sa Pauli ki cannòsciu e mi bivu diri po diri, no seu in sa
bidha mia. Eya ma aundi' Is matas funti medas e artas, mai bias aici mannas,
no esti unu padenti de ilixi o arrobi o sruexus, boh' Fèssidi kene matas
mi podia parri Cùcuru Terra Teula ki abascendisia lèbiu lèbiu fintzas a bintrai
ins su mari, o in sa Pauli candu no nci fìada istètia sa bonìfica. Totu esti
atesu un'iscantus kilòmetrus sceti, ma no nc'esti àteru ki deu potza biri
cirkendi calancuna cosa ki potza arrecannosci.
'Hoi, kini sesi'' 'Deu seu Mariedhu!?' Dhi nau e torru a nai, ma nudha. Deu
imoi seu in àxiu de arrespustas, ki perou no sìanta cussus sùlidus, sùspidus
unu infatu de s'àteru de cumboxis, o mellus a mei pàrinti de aici. Issu,
cudhu ingunis, mi càstiada cun curiosidadi, assumancu aici pàridi a mei.
In s'interu, deu pentzendi de aici, circu de mi cumbinci. 'Ada tenni sa matessi
curiosidadi de mei e totu''. Ma aundi seu, imoi, sèmpiri de prus no sciu
innui seu. In prus ai custas matas medas artas e birdis, allenas, biu montis
unu pagu acanta de nosu ki s'abàscianta lèbius ca a bellu a bellu nci càlanta,
aparixaus, aici a s'iscusi aintru de su mari innui s'intùdanta. Totu i custus
no esti atesu prus de una pariga de kilòmetrus de innui seu deu e i custu,
i custus, ma no nc'esti àteru, àteras cosas ki potzu billai cun d'unu corpu
de ogu impressiu e mesu atrupelliau.
Debadas! Nudha, no si pòidi fai nudha. Labai, torra, cudhu sonu a dillu,
dirillileru, ki mi esti fendi dilliriai, e imoi mi pàrinti ca funti totus
tot'unus. A pustis, ma illuegus, de sùncunu, mi benidi in bidea de mi ndi
fuiri. 'Ma aundi'' A nci pensai beni beni poita ca mi depu fuiri' Ca custu
'Itadhinanta' s'imprus ca mi sulai cuss'ispètzias de sonus no m'amòstada
nisciuna cosa contras. Aici mi pàridi de intendi ma no mi nareis po ita ca
no nci arrennèsciu a si dhu crariri mancu a mei e totu, oi puru. In s'interi
is àterus 'Itadimòniusdhisnanta' ant'essi facci a coranta s'atòbianta a nosus,
sulendi, scribillendi fra issus, de issus a ke nosus duus e po mei. Arratza
de cuntzertu!
Mi detzidu, pigu abellu a bellu, po dhu fai biri craramenti a totus, pigu
a bratzetu custu 'Itastocadadhutzèrriu' ki bai circa poita mi fàidi arregordai
a Efis, un'amigu de mei, forsi poita esti issu puru esti piludu cumente a
i custu. A pustis cumenti a unu makiori, o mellus tontesa, mi pongu deu puru
a circai de fai is sonus ki fàinti custu 'ItadhinantaEfis' arratza de ispètzia
de mantininca. Isperendi de mi porri fai cumprendi. Ma no tengu àteras cosas
in su cùcuru arretronau de su dillu, dillirilleru, ca mi càncarada sa menti
de su spantu. Un'ota ca seu arrennèsciu a dhu pigai, cirkendi cun custu de
dhi cunditzionai sa diretzioni, impunnaus conca a is àterus, ma deu femu
giai pensendi 'Ma bellu! E a pustis'' A i custa pregontada de mei a mei etotu,
mi fìada inghitzendi a pigai a timi, candu 'ItadhinataEfis' si ponidi a mi
carinniai cun cussas manus mannas ca mi parìanta marras po traballai sa cracina
bia. De siguru no fìada po i cussa arresigadura ke broketus de is manus suas,
ki mi fìanta mesu scroxendi, ma su de dhas intendi in pitzus de mei e sa
bisura de sa cara sua, mancai fèssidi unu pagu strecada, mi faìanta cumprendi
e intendi ca non mi bolìanta mali e no dhus istrobamu po nudha. Antzis
'ItadhunantaEfis'
m'atumbada cun su corpus de issu cumenti femus caminendi, corpus de ancas
piludas ca mi parìanta incorrada de boi in is costas. Is pilus, is tzudhas
de issu parianta is puntas de is dentis de serracu po segai linna.
Ma totu i custu mi faìada cumprendi ca issu, ca issus, no mi fìanta nemigus,
ca no dhus istrobamu prus de tanti e antzis, forsis seu allarghendimia meda,
ca agradessìanta is srùbius, sùlidus, sùspidus ki dhis faemu fintzas deu.
Sa cosa mi faìada meda prexeri, e imoi emu detzidiu, de bonolla, de dhus
sighiri, cirkendi e isperendi ca totu su carraxu ca dhis femu cuncodrendi
arrennescìada a dhis si nai ca femu prexau a 'fuedhai' cun issus. Po dhis
nai ita' No tenemu nudha de dhis nai, sceti ca no tenemu nisciuna cosa mala
contras a issus. E ki no fèssidi istètiu de aici, cumenti emu pòtziu, deu
a solu, fai calincuna ancada contra de issus' Ca immoi fuenta prus de
duxentus'
Ma ki deu imoi femu prexau de dhus tenni cun mei, custu isperamu e mi parìada,
assumancu ca femmu arrennèsciu a si dhus fai cumprendi cun totu cussu de
s'atumbai.
Fìada istétiu de aici ca mi nci enta fatu lompi in mesu a tot'issus , a mei
parìanta totus agualis, po mei s'intèndidi, ca no arrennescemu a cumprendi
e a bodhiri difarèntzias aintrus de issus. Sceti 'itadhinantaEfis'ca teniada
is pilus cirdinus antzis ke a furriotus e ca tenìada su nasu strecau e kene
càrigas ke unu bosceri. Sigheus unu mori in mesu a su padenti po una bella
mes'oredha e camina camina lompeus in una spètzia de pratza in mei a is matas
innui nci fuenta is barracas de issus, cumenti a pinnetas. Ci fìanta fogus
allutus, e totu a reu in mesu a is pinnetas nci fenta pipiedhus, creu, poita
fenta pitikedhus. Ma perou ita stocada fìada parìanta totus agualis no si
arrennescìada a biri e a cumprendi kini fìada mascu o fèmina, fenta totus
agualis. Si setzeus ainnantis a unu fogu acorrau mei de perdigonis lisus
e tundus de arriu, innui nci fìada sètzia una pingiadas, mellus cradhaxus,
innui nci fìanta budhendi cixirianu kene de ispisai. Mi ndi enta passau una
fumia fumia e meda callenti, antzis budhendi e femu po dha mussiai'
Mariedhuu! Mariedhuuu!! Ohh Mariè!'!
Uhh, Ahh'!' S'it'esti' Ah imoi nci seu!
Su palatzu no fìada una cosa manna meda, tre pianus, fìada aici grogastu
istrantaxau in sa parti bècia de sa Bidha, a costau de su Masixedhu, a pustis
de su passaditzu a s'intrada nci fìada un'òmini mannu mannu cun duus mustatzus
longus e niedhus ke sa pixi, pregontada is billetus. Si calada a bàsciu in
sa scala a tres passadas a manu mankedha de s'òmini mannu mannu. In bàsciu
no ti fìasta abetau un'aposentu aici mannu cumenti a 'galleria' bistu ita
fiada s'intrada de su logu.Custa fiada manna meda, de longaria e de largaria,
nci podianta capi prus de cuatruxentus postus, sa bòvida meda arta e cun
is ainas po intronai is boxis. Eya, s'ìada pòtziu biri custu film ki tenìada
unu tìtulu ispedhiosu e a unu pretziu bàsciu meda. Sa genti fudi cuta in
meda a dhu biri e mi parìada ki donèssidi arrexoni de i custas impressionis
de mei. Fìada sa prim'orta ca andamu a biri is cartonis, ki no fìanta cudhus
giai medas bius e medas bortas de Walt Disney ca a mei no praxìanta prus
de tanti. Su film fìada titulau 'Allegro ma non troppo' pràtziu in cuatru
contus. Cumenti a musica de acumpàngiu, colonna sonora, tenìada su Bolero
de Ravel. Ahah! Ecus! Ita fìada cussu makiori de dillirillera ki no mi bolìada
scampiai de su ciorbedhu e ki fìada scimingendimia. Mama mia m'ìada acumpagiau
sa di ki emu fatu is annus, trexis po sa precisioni, e po istrina m'ìada
potau cun issa, poita praxìada a issa puru biri custu films, a biri una manera
noa de fai prexeri a is pipius. Mi fìada praxu meda. Unu contu fìada custu:
unu botuledhu de coca colla, sbuidu, fìada istétiu scutu in aria meda a forti
e fìada lòmpiu fintzas a sa luna, innui ndhi fìanta bessius is ùrtimus stidhius
abarraus aintru. De i custus istidhius a bellu a bellu si torrada a cumentzai
s'istoria de sa vida patendi de sa vida in formas ilementaris a cussas prus
cumpressa e a lompi a is òminis passendi totu su tretu de is animalis prus
pagus irvilupaus.
Ecus, esti innia ca emu biu po sa prima borta 'ItadhinantaEfis'. Immoi mi
ndi àrtziu ca mama mi esti tzerrendi po m'illikidiri. Depu andai a iscola
in sa de s'Àrgini, sa 'Lamarmora' in terza A.
