www.occitania.org ; http://vivenciaaranesa.blogspot.com
RECORDA .......... MANIFESTACION el 22 d’octòbre de 2005 a Carcassona
MANIFESTAR PER L’OCCITAN
"Anem ! per la lenga occitana, òc !"
L'aficha oficiala de la manifestacion, òbra del pintor Pèire François
Organitza lo collectiu « Manifestar per l’occitan »
Compausicion del collectiu :
Institut d'Estudis Occitans (IEO);
Federacion Ensenhaires Lenga Cultura d’Òc (FELCO);
Confédération des Calandretas;
Oc-Bi : Association souhaitant développer l’enseignement bilingue français-occitan, dans l’enseignement public;
e Conselh de la Juventut d'Oc.
Contact : contact@manifestarperloccitan.com
segonda edicion: 22-31 d'octòbre
La Caravana Occitana de 2005 se prepara
Dempuèi lo primièr acamp de preparacion de novembre passat, lo movement Gardarem la Tèrra contunha de preparar l’organizacion de la segonda Caravana Occitana.
Aprèp un bilanç mai que positiu per sa primièira edicion mercés a la mobilizacion de cada estructura e l’investiment brave de totes los actors locals que participèron al succés de la primièira Caravana dins cada vila traversada, aquela edicion nòva ensajarà de se debanar dins de vilas o despartaments novèls per qu’Occitània tota siá representada a cada edicion.
Se l’annada de 2004 permetèt de far la virada «Dis Aup i Pirenèu e la man dins la man », vision del país tan cara al felibre Frédéric Mistral, l’annada de 2005 serà l’annada del seissanten aniversari de la creacion de l’IEO qu’afirma que "la fe sens òbra mòrta es".
Per portar pèira a l’òbra, lo percors de la Caravana Occitana permetrà un moment d’escambi e de paratge entre totes, long del País. Los primièrs acamps de preparacion fixèron lo tèma de la segonda edicion que serà lo de la Lenga e tanben de l’Aiga, al moment que se tenon de forums mondials sus la question de l’aiga sus nòstra planèta. Occitània es concernida coma d’autres paises pel mond per aquela question, tan coma l’es sus la question de la lenga. Per parlar clar, sens aiga tan coma sens lenga, l’òme crèba.
D’acamps preparatòris per la realizacion d’aquesta Caravana Occitana de 2005 permetèron de decidir de sas datas e d’una primièra idèa de percors. Aital, l’aventura, duberta a cadun, se debanarà del temps de las vacanças escolaras d’octòbre que son comunas a totas las acadèmias. Lo despart se farà lo dissabte 22 d’octòbre de Montpelhièr per anar a Carcassona lo meteis jorn puèi per jónher la Val d’Aran lo 23. Dins la logica de son percors, seriá plan que la Caravana passèsse per las regions Miègjorn-Pirenèus, Aquitània, Lemosin, Auvèrnha, Lengadòc, Ròse-Aups per anar puèi dins las Valadas Occitanas d’Italia a l’entorn del 29 d’octòbre; una abans-darrièira etapa se fariá en Provença del costat de Brinhòlas per una arribada prevista lo 31 d’octòbre a Besièrs.
La Caravana se podrà pas arrestar de pertot qu’es limitada en temps e mai que mai en argent, mas sa virada se pòt encara ajustar. Totas las prepausicions e las bonas volontats d’Occitània tota son las benvengudas e convidadas a l’acamp de preparacion que ven, a tres oras lo dimècres 11 de mai e lo dimècres 1èr de junh al 42, carrièira Adam de Craponne a Montpelhièr. Entresenhas al 06 81 50 85 33 e sul sit http://gardaremlaterra.free.fr/
