Fiat unu domìnigu a mengianu, in su mellus de su beranu. Georg Bendermann, unu piciocu chi faiat su butegheri, fiat sètziu in s’aposentu suu a su primu pianu de una de cuddas domixeddas bàscias, arringheradas oru oru de arriu, e chi podiast scerai sceti de s’artària e de su colori.
Acabbau chi iat una lìtera po un’amigu de gioventudi chi biviat foras, dd’iat serrada cumpràxiu e si fiat postu in sa fentana, is guidus in sa mesìllia, a mirai s’arriu, su ponti e is montigus birdàncius de s’àtera riba.
A cussu amigu pensàt, su chi tant’annus innantis, arròsciu de bivi cun su babbu e cun sa mamma, si fiat fuiu a sa Rùssia.
Innia, in sa citadi de San Pietroburgo, iat postu una butega chi a primìtziu iat trabballau beni, ma apustis fiat andada mali, cumenti contàt issu etotu candu furriàt a bidda, sèmpiri prus pagu in is ùrtimus tempus.
E aici issu s’agatàt trumentendi in una terra istràngia. Sa braba segada a sa moda furistera dd’inguarnissàt sa cara connota in picinnia, ma su colori grogànciu de sa peddi cuàt calincunu mali. No si portàt beni meda cun is de San Pietroburgo, aici naràt issu, ma mancu cun is de bidda sua chi biviant innia, e duncas s’incarreràt a abarrai bagadiu.
Ita tocàt a ddi scriri a un’òmini diaici? Cosa de ti ndi parri làstima fiat, po totu is isbàllius chi iat fatu, e no faiat nimancu a dd’agiudai. A ddi nai de ndi furriai a innoi tocàt? de torrai a incumentzai totu sa vida sua tribbuliada impari a is amigus suus de intzandus, chi no biiant s’ora de dd’agiudai? E custu no fiat cumenti a ddi nai ca fiat istètiu peus de unu pipieddu andendisindi a logu stràngiu, e po cosa puru, e ca fiat ora de ndi contoniai ca totu su chi iat cunziminau de fai innia fiat andau in ora mala, e chi ndi pighessit s’esempru de is chi si ndi fiant abarraus anca fiant? Ma prus de totu, ndi baliat diaderus sa pena? Incapas no iat a essi mancu torrau, giai chi issu etotu naràt ca no cumprendiat prus su logu aundi fiat nàsciu, e s’iat a essi abarrau in logu stràngiu mancai mortu de fàmini e sèmpiri prus atesu de is amigus. E si ndi fessit torrau diaderus, ma no nci fessit arrennèsciu a si nci agatai beni, ni cun is amigus e ni cun su logu, no po nexi de nisciunus, ma cumenti podit sutzedi, e intzandus po istai mali aici, no iat a essi stètiu mellus a nci ddu lassai in terra de Rùssia? Cumenti iat a essi bìviu innoi? Sèmpiri agiudau de is amigus?
E duncas si sighemus a iscriri, ma iscriendisì de cuddas litereddas chi chistiònant de totu ma no nant nudda.
Giai tres annus fiat, chi no furriàt a bidda, sèmpiri boghendindi s’arreghèscia de sa situatzioni polìtica russa. A su chi naràt issu no faiat a movi, ma a nai sa beridadi su prus de is russus fiant sèmpiri a giru peri su mundu. Meda depiat cambiai po Georg, pròpiu in cussus annus. Sa mamma si fiat morta e issu fiat andau a bivi ande su babbu. Dd’iat iscritu a s’amigu puru, e cussu dd’iat mandau una lìtera cun is passièntzias, ma aici frida chi a Georg ddi fiat partu chi no essit cumprèndiu beni s’acontèssiu. Pustis de custu acadessimentu Georg si fiat ghetau a su trabballu cumenti e unu macu. Candu s’agatàt ancora sa mamma, sa butega dda mandàt a innantis issa, e su babbu no iat bòfiu fai cumenti naràt su fillu, ma imoi ca sa bonànima no nci fiat prus sa cosa pariat cambiada, e Georg podiat passai a ghiai s’atividadi. E siat ita si siat, sa cosa iat pigau a andai beni, antzis sèmpiri mellus, ddui iat benda meda e iant fintzas dèpiu assumi unus cantu piciocheddus.
S’amigu perou no ndi sciiat nudda. Una borta, incapas in sa lìtera de is passièntzias, iat circau de cumbinci a Georg a movi a sa Rùssia, nendiddi ca cussu fiat su logu mellus po s’atividadi cosa sua. Ma sa sienda fut tropu manna po pensai de andai a dda sperdi in logu stràngiu. Ma de custu no ndi iat fueddau cun s’amigu, e imoi no faiat prus.
E aici sighiat a ddi contai contixeddus de forredda, chentza de cabu, aici cumenti dd’acucàt, cumenti si fait in is meigamas de su domìnigu. No ndi ddi boliat isculai s’arregordu de sa citadi sua, aici cumenti dd’iat connota. A unu certu puntu iat pigau a ddi contai de custu giòvunu chi si fiat fatu a isposu cun una picioca calisisiat, tanti po ddi contai calincunca cositedda, ma cussu invècias si fiat interessau.
Cumenti si bollat chi siat, Georg preferiat de prus a ddi contai de cussus contixeddus chi no de is fatus suus, giai ca issu puru si fiat fatu a isposu cun sa sennoredda Frieda Brandenfeld, filla de un’aredeu de brofetu. Fatu fatu nd’arrexonàt cun issa puru de custu amigu suu disterrau, e de is lìteras chi si mandànt. “Intzandus no benit a sa coja nosta” naràt issa “Ma mancai diaici, deu ddu bollu connosci a su pròpiu”. “No ddu bollu strobbai” ddi torràt Georg “Si benit mancai si nci agàtat mali, mi iat a imbidiai, e iat a torrai a movi prus tristu e afrigiu de prima, cumprèndiu?”.
“Eja, gei dd’apu cumprèndiu, ma chi calincunu si ddu scòviat?”.
“Podit essi puru, ma chi pagu pagu ddu connòsciu, gei mi parit trabballosa sa cosa”.
“Georg, giai chi abbitas cun genti aici, mancu ti depiast fai a isposu cun mei”.
“Tenis arrexoni, ma imoi no fait prus a cambiai”.
E candu dd’iat basada e issa dd’iat sighia cun “Ma a mei mi dispraxit aici etotu”, insaras iat detzìdiu de apannai su disìgiu. “Deu seu cumenti seu, e chi ddi àndat beni est aici” si fiat fatu sei sei “E certu no apu a cambiai po issu”.
E difatis su domìnigu infatu, in sa lìtera chi dd’iat iscritu, dd’iat nau de sa bella novidadi: “A ùrtimu t’apu lassau sa mellus cosa, mi seu fatu a isposu cun una bella picioca de bona famìllia, chi si nd’est benia a bivi a innoi candu ses mòviu tui, duncas no creu chi dda connosciast. Gei ti nd’apu a contai, po imoi t’abastit a isciri ca mi ndi prexu meda. Custas dis t’at a iscriri issa etotu, e eis a essi bonus amigus de siguru, e no mi parit pagu cosa. Gei ddu sciu ca ses malu a movi, ma no iat a podi essi custa s’ocasioni bona? Pensanci beni, ma no ti intendast obbrigau a nudda”.
Georg si fiat aturau cun cussa lìtera in manus castiendi sa fentana, candu in s’arruga fiat passau unu chi connosciat e chi dd’iat saludau, intzandus issu dd’iat torrau unu schirìngiu de arrisu.
Pustis si iat postu sa lìtera in buciaca e si fiat tirau conca a s’aposentu de su babbu, passendi de su passaditzu. Fiat de diora chentza de intrai in cussu aposentu, ma a nai sa beridadi a su babbu gei ddu biiat bastanti. Si biiant in su trabballu, papànt impari a mesudì, e apusti cena si issu no nci bessiat cun is amigus o cun sa sposa, si stentànt impari in s’aposentu de arriciri a ligi donniunu su giornali cosa sua.
A Georg ddi fut partu curiosu cuss’aposentu aici scuriosu tambeni in una bella dì de soli. S’umbra de su muru fiat aici arta chi agiumai ndi pinnigàt totu sa pratza. Su babbu fiat in unu furrungoni acanta de sa fentana, beni ingiriau de is arregordus de sa mulleri, e ligiat su giornali aguantendiddu unu pagheddu de atesu po ddu podi biri mellus.
“Ah! tui ses” dd’iat nau su babbu pesendisindi po dd’atobiai. Caminendi sa giancheta si fiat oberta e is orus bolànt totu a fùrriu a fùrriu de s’òmini.
“Babbai est sèmpiri unu giganti, no nc’est nudda de fai” iat pensau Georg.
“No fait a nci abarrai de su scuriu, innoi” iat aciuntu de pustis.
“Est berus” dd’iat torrau su babbu.
“Sa fentana puru as tancau?”.
“Eja, mi praxit de prus”.
“Sa basca chi est faendi in foras!” iat nau Georg po segai s’arrexonamentu, e si fiat sètziu.
Su babbu iat pinnigau totu su chi ddi fiat serbiu po su smurzu e dd’iat arrimau asua de sa càscia.
“Po sa coja fiat” iat sodigau Georg castiendi a su babbu, “A s’acabbada si dd’apu nau a cuddu amigu miu”. Fiat giai boghendindi sa lìtera de buciaca ma pustis nci dd’iat torrada.
“Cali amigu?” dd’iat nau su babbu.
“S’amigu miu de San Pietroburgo” dd’iat torrau Georg castiendisiddu beni. Gei est diversu de candu trabballàt! Ma poita si setzit diaici totu scosciau e cun is bratzus in piturras?”.
“Ah! s’amigu tuu” si fiat fatu.
“Gei ddu scis ca a printzìpiu no ddi bolia nai nudda de su sposòriu, po arrispetu. Est unu piciocu unu pagheddu stròllicu, gei t’at a arregordai. No ddi bolia fai sciri nudda, chi calincunu si ddu bolit nai chi si ddu nerit, ma de mei no nd’at a isciri nudda, apu nau”.
“E imoi storrau ti ses?” iat nau, arrimendi su giornali e is ullieras, e cuendiddus cun sa manu.
“Eja. Est sèmpiri stètiu bonu e onestu cun mei apu pensau, e tòcat a si ddu nai. Creu chi si nd’at a prexai, ma innantis de ddi mandai sa lìtera, seu bènniu a ti ddu nai”.
“Georg” dd’iat nau su babbu, “Ascurtamì beni, ndi ses beniu ande mei po unu cunsillu e àndat beni, ma custa est cosa de pagu contu diaderus, sterri duncas sa chistioni e nara su chi ti serbit!
Imoi no mi bollu ponni a morigai cosa chi no nci ìntrat nudda cun su chi ses nendi tui, ma de candu est mancada sa bonànima de mamma tua, gei at sutzèdiu calincuna cositedda chi no mi est pràxia nudda nudda. In su trabballu tanti po nai, ita totu seis istrechendi? Sa cosa mi seis cuendi? Deu no nci dda fatzu prus a abarrai infatu de totu is chistionis, màssimu de candu m’agatu a solu, ma chi depeus arrexonai de calincuna cosa, arrexoneus de custu e no si perdaus in ciaciarras! Ita est custa stòria de s’amigu tuu de San Pietroburgo?”.
Georg si ndi fiat istrantaxau luegus. “Lasseus a perdi is amigus mius, su babbu est su babbu e is amigus funt is amigus, milli amigus no faint unu babbu. Antzis ddu scis ita ti nau? Ca depis pensai de prus a tui e a sa saludi tua, ca tenis s’edadi chi tenis, e a trabballai gei àndat beni, ma a primu ti depis torrai a alleputzai, e apustis totu s’àteru, intèndiu m’as? E chi serbit, po sa saludi de babbu miu, serru sa butega cras etotu. E no, babbai aici no àndat beni, ses bivendi in custu aposenteddu scuriosu, in logu de bivi in unu prenu de luxi, no ses papendi cumenti si depit, tastas calincuna cositedda innoi e innia, sa fentana sèmpiri serrada candu iast a tenni abisòngiu de àiri frisca. Eh no! No andaus de acòrdiu mancu po nudda! Imoi tzerriaus su dotori e faeus cumenti nàrat issu. Deu mi ndi bengu a innoi e tui movis a s’àteru aposentu prus mannu, nci portaus totu sa cosa tua a innia e as a benni a biri ca ti nci agatas beni. Tui crocadì ca gei nci pensu deu, beni ca t’agiudu a ti spollai, aici ti pasias pagu pagu ca gei ti merescit, o bolis a ti crocai in deretura in s’àteru aposentu, in su letu miu?”.
Georg fiat acanta acanta de su babbu, chi iat incrubau sa conca canuda e iscrabionada in su petus.
“Georg” iat musciau su babbu chena de si cinni.
Georg si fiat incrubau luegus acanta sua, biiat sa faci sua fadiada, e is pipias isprapaddadas in is culungionis de is ogus.
“Tui amigus in San Pietroburgo no ndi tenis. Est ca ti praxit a brullai, cun mei puru, ma cumenti fais a tenni un’amigu innia, mi ddu naras?”.
“Arregordadindi” dd’iat nau in s’interis chi ndi ddu fiat istrantaxendi de sa cadira po ddu podi spollincai. “Tres annus fait est bènniu a s’agatai. No ti praxiat meda, ca est curiosu puru, gei ti cumprendu. Po duas bortas est bènniu ande nosu, ma no t’apu nau nudda. Ma nci iast arrexonau a su pròpiu e mi iat fatu prexeri. S’iat nau de is cosas de sa revolutzioni russa, cosas de ispantu, a tipu sa borta chi s’iat contau de cuddu predi chi incarau in unu terratzeddu si iat fatu una gruxi in is manus cun un’arresoja, e pustis totu insanguentadas cumenti fiant, ddas iat aparadas faci a sa genti e si fiat postu a chistionai a itzèrrius. Tui etotu dda contast custa stòria fatu fatu”.
In s’interis Georg iat torrau a setzi a su babbu e ndi dd’iat pigau is cratzonis chi portàt asuba de is mudandas de linu e de is mìgias. Candu si ndi fiat sapiu de sa pagu limpiesa de is mudandas, iat pensau ca dd’iat tropu scabudau a su babbu.
Cun sa sposa ancora no ndi iant chistionau, de su babbu, ma chentza de si ddu nai iant giai detzìdiu chi issu si ndi depiat abarrai a solu anca fiat. Ma pròpiu in su momentu iat cambiau idea, e iat dispostu de si ddu pigai cun issus. A dda contai giusta, a castiai cumenti fiat su babbu, pariat una cosa detzìdia giai tropu a trigadiu.
Nci dd’iat crocau aguantendiddu cun is bratzus. Biendiddu gioghendi cun sa cannaca pendi pendi in petorras, ndi ddi fiat partu làstima. No nci podiat arrennesci a ndi ddi bogai cussu giogu e a nci ddu crocai.
Cumenti nci dd’iat fata, su becixeddu si fiat imbussau fintzas a conca, a solu, e iat lassau is ogus isceti a foras, po ddu castiai, asseliau.
“Imoi gei ti nd’arregordas tui puru, berus?” dd’iat nau totu carinniosu.
“Imbussau beni seu?” dd’iat torrau cussu, castiendisì is peis.
“Intzandus gei ti praxit a essi crocau!” dd’iat nau Georg imbussendiddu beni.
“Imbussau beni seu?” iat nau torra.
“Ca ei, atura trancuillu”.
“Ca nou!” iat itzerriau su babbu e si ndi fiat istrantaxau totinduna, scavulendinci cudda manta a trevessu e chi bolendi si fiat totu oberta.
In pitzus de su letu fiat, e portàt una manu in sa bòveda. “Tui mi boliast acarraxai pilloni miu, ma no m’as acarraxau ancora. E mancai siant is ùrtimas fortzas mias, po tui gei abàstant, tropu puru funt. Gei ddu connòsciu a s’amigu tuu, unu fillu mellus de tui iat a èssiri stètiu. Est po cussu ca dd’as sèmpiri improsau in totu custus annus. Po cussu dd’as fatu, ita ti creis ca no apu prantu po issu? Po cussu ses sèmpiri inserrau in s’aposentu tuu scriendi lìteras de nci mandai a sa Rùssia, e no bolis a ti strobbai, su meri tenit cosa de fai! Tui iast a bolli imparai a su babbu a fai fillus. Imoi chi ti ndi ses postu meri de totu sa sienda cosa mia, ti ses detzìdiu a cojai puru.
Georg iat castiau sa figura orrorosa de su babbu. Totinduna s’amigu de San Pietroburgo, chi su babbu puru connosciat beni, dd’iat fatu a timi. Parit ca ddu biiat, in terra de Rùssia, solu che perda, disisperau in su liminarxu de s’enna de sa butega sua. Sa cosa de bendi totu ghetada apari, is aposentus isciorrocaus, is làntias pendi pendi in sa bòveda, ma poita si ndi fiat andau aici aillargu, ma chini si dd’iat fatu fai?!
“E castiamì in faci candu ti chistionu!” iat itzerriau su babbu e fiat curtu conca a su letu a pinnigai calincuna cosa, ma si fiat firmau.
“Cudda craba at aciuddau sa gunnedda” iat sodigau aciuddendi sa giancheta issu puru po dda stroci, e lassendi biri sa ferta de gherra chi portàt in sa còscia. “E tui no as cumprèndiu prus nudda”. “Bai ca tui ses còmudu, po ti nci podi spassiai tui, as disonorau a sa bonànima de mamma tua, as traìxiu a s’amigu tuu de Rùssia e nci as postu a babbu tuu in su letu po chi no ti strobbessit tropu!”. “Ma cosa de arrimai ti pàrgiu?” e istrantaxu cumenti fiat, si fiat postu a atiddai cumenti e unu macu, totu cumpràxiu.
Georg fiat acorrau in unu furrungoni atesu de su babbu. Si fiat postu ingunis po chi su bèciu no ddu pighessit a traitoria, ma no ddi podiat arregordai e ita depiat fai imoi. Po unu momentu ddi fiat arregordau, ma luegus dd’iat orvidau torra.
“Ma a s’amigu tuu no dd’as imbovau ancoras!” iat nau su babbu amonestendiddu cun su didu, “Gei nci apu pensau deu!”.
“Òmini fingiu!” iat itzerriau Georg, ma si ndi fiat arrepentiu luegus, e si iat mussiau sa lìngua a forti a ogus isprapallociaus.
“Eja seu fingiu, naras tui. Sa beridadi est, e ita depemu fai? In su trabballu mi impròsant, fillu miu mi impròsat, ita depemu fai, naramiddu tui e arregordadindi ca mi ses fillu, naramiddu tui e ita depemu fai, bèciu perdali e solu che fera. E fillu miu girendi peri su mundu, boddendindi su chi apu seminau deu, faendi su sennori cun s’allenu, e beniast ande mei puru! E su nai chi t’apu stimau, fillu miu”.
“Fra pagu si indullit” iat pensau Georg de suncuna, “Ma no nci podiat arrui e si strupiai!”.
Su babbu gei si fiat indùlliu ma no nci fiat arrutu. Biendi ca su fillu no s’acostàt, si ndi fiat torrau a istrantaxai.
“Abarradindi anca ses! Ita ti pensas chi siat totu cumenti naras tui? No ti dda cretast! Seu ancora deu su meri innoi! A solu no nci dd’emu a essi fata, ma mamma tua m’at lassau totu sa fortza sua, s’amigu tuu puru est cun mei, e su trabballu tuu sèmpiri a buciaca mia tòrrat!”
“Buciaca in sa camisa puru pòrtat” iat sulau, e iat pensau de ddu podi citiri diaici, ma cussu puru ddi fut iscarèsciu in unu patrefìliu.
“Imprassadì sa sposa tua e beni ande mei, gei nci pensu deu a nci dda bogai!”.
Georg iat frunziu is murrus, ma su babbu sconchiendi ddi torràt ca ei, sèmpiri castiendi a cussu corratzu anca si fut istichiu su fillu.
“Balla! Oi mi nci seu spassiau diaderus cun su contu de su sposòriu! S’amigu tuu iscit giai totu, de diora, ca si dd’apu nau deu! Ti ndi ses iscarèsciu de mi ndi pigai su chi mi serbit po iscriri! Po cussu est ca no contòniat s’amigu tuu, ca iscit totu e mellus de tui puru! Candu dd’arrìbbat sa lìtera tua mancu dda ligit, ca iscit giai totu de sa mia!”.
“Iscit totu e mellus de tui!” iat torrau a nai su bèciu a itzèrrius e a manus a celu.
“Milli bortas!” si fiat fatu Georg, boliat essi una bessida befiana, ma fiat istètia sèria sèria.
“No femu abetendi àtera cosa. Po annus e annus, no apu pensau a àtera cosa, ita ti creiast chi nci passamu s’ora ligendi su giornali? Ne! Castia tui etotu”, e dd’iat aportu unu giornali chi ndi iat pigau de su letu, bai circa e cumenti. Fiat aici bèciu chi Georg mancu dd’iat acurtu.
“Fata nci dd’as! E gei fiat ora puru! Mamma tua ses morta chentza de connosci custa dì, s’amigu tuu est disisperau in terra de Rùssia, giai tres annus fait fiat grogu che sa cera, deu seu cumenti seu, gei mi bis, e tui imoi ti ndi scidas?!”.
“Ma ita fiast billendimì totu s’ora?!” Iat aboxinau Georg.
“Innantis ddu depiast nai, no imoi” dd’iat torrau su babbu lastimosu. Imoi ti ndi ses iscidau, fillu miu, no seus a solus in custu mundu, ddu scis?, s’agàtat àtera genti puru, e no tui sceti. Ma tui ses che unu pipiu notzenti, e ses unu dimòniu puru! E narendi custa ùrtima cosa iat torrau a itzerriai. “E duncas deu ti cundennu a morri allupau!”.
A Georg ddi pariat de s’allupai diaderus, s’arrutroxa mala de su babbu in su letu dd’iat a essi arrentronada in conca po tempus meda. In is iscalas, chi iat fatu cumenti e chi fessint una caladroxa iat istumbau a sa fèmina chi teniant acodrada in domu, e chi fiat artziendinci a mundai su logu.
“Gesugristu miu! iat itzerriau cussa atzicada e cuendisì sa faci cun su deventali. Ma Georg fiat giai a trevessu.
Nci fiat istupau de su portali che unu guetu, iat passau sa ferrovia e fiat curtu a circai àcua. Si fiat afracau a sa barandìllia de su ponti cumenti a un’abbramiu chi s’afràcat a sa cosa de papai. Si nci fiat ghetau ca pariat de cuddus ginnastas nomenaus, e in gioventudi ddu fiat istètiu diaderus unu bravu ginnasta, e benimindi prexu de su babbu e de sa mamma.
Ma ancora si aguantàt a sa barandìllia cun is manus, chi fiant acanta de lassai perou. A palas de sa barandìllia iat biu unu postali passendi chi podiat cugutzai s’arrumòriu de sa tzapulada sua.
“Mamma, babbu, scipiais ca s’apu sèmpiri stimau, e ca si portu in su coru” iat nau, e si fiat lassau andai.
In s’interis su ponti fiat prenu de màchinas andendi e torrendi.
