Finas sa pessona sa pius otimista de custu mundu, amus a narrere, cussa chi at pessadu sempere chi totu sos omines ant calchi cosa de bonu in fundu in fundu a sas intragnas issoro, at a podere agatare dificultade a respundere “emmo” a custa pregunta.
Omines bonos e onestos bi nd'at, b’at a mancare ateru, e pro fortuna, ma est a los aciopare però, e a los bidere a coberrere postos de trabagliu importantes!!!
Ma l’ischimus comente mai custa chirca de zente onesta e balente, unu pagu a s’antiga, de omines de onore, est gai difitzile?
Ello, chi giai s’ischit ite sutzedet cando canlincunu si faghet notare pro onestade e bravura!
Si s’allineat a politica, lobbies e poderes fortes faghet una carriera manna e longa meda. Bastat de abasciare sos ogos e narrere sempere chi emmo, finas a cando, dae onestu e bonu, at a mudare ideales e vida.
Ma si s’omine onestu, intelligente, bonu e corazosu proat a andare contras a sos “mannos” ite sutzedet?
Lu faghent passare che a unu macu! Comintzant a nde faeddare male e a nde pienare su mundu de faulas a subra de isse e finas de sa familia sua puru!
Lu faghent fora! Ma fora no cun sa violentzia, b’at a mancare ateru (finas si capitat cussu puru!) pius che ateru cun sa prepotentzia e su disfamamu.
S’ischit comente andant custas cosas, no?
“Tue no ses nisciune, non ses unu politicu connotu, non ses ricu, no ses in peruna lobby, ma a inue cheres andare?”
Sa beridade est custa, peruna pessona in unu postu pubblicu a livellu altu o in politica, si est seriu e onestu, podet trabagliare pro sa comunidade.
Finas si est bravu e lu faghet pruite bi creet, finas pruite lu faghet pro sos ideales suos o pruite lu cheret faghere pro sos ateros!!
Sa politica, inniorante e prepotente si che ponet in mesu sempere, e pro faghere sos interessos de un’ala o de un’atera si nde’impippat de s’onestade, de sas cumpetentzias, de sa bravura o intelligentzia.
Antzis, sebera zente tonta e inniorante puru, gai li podent faghere fare totu cussu chi cherent, tanto cussos non si nd’abizant nemmancu….finas a cando non s’acciopant in calchi “indagine giudiziaria”!
Paret unu machine ma sa realidade est gai e nisciune resessit a mudare cust’unda chi faghet fora totu cussu chi est tropu onestu e piuschetotu lìberu.
Sutzedet finas chi si calencunu faghet sas cosas chena perunu interessu (de dinare) lu leant pro macu, e passant chi si lu faghet cun fortza e corazu e creendebei b’at a essere de seguru una resone chi li torrat in contu. Semus gai avesos a bidere chi sunt sempere cussos agiudados dae sa politica a andare a innanti, chi si andat a innanti unu onestu deaberu, e pagu connotu puru, lu leamus pro unu chi nos coglionat comente sos ateros.
Ma custa est sa libertade e s’onestade? Est pro custu chi at a servire sa politica?
Est pretzisu chi, si calincunu faeddat cuntra a su “regime” in auge in cussu mamentu, dresta o manca chi siet (pruite sunt totus su mantessi) li tuppent sa bucca? Est pretzisu chi si calincunu at ideas divescias o est tropu onestu non at pius deretos pro trabagliare?
Istrubat?
Ma seguros semus chi bivimus in una democratzia? O non semus bivende cun s’illusione de essere liberos e democraticos ma a sa fine nos acciopamos comente cussos intellettuales pro sa “campagna de sos chentu fiores” in s’epoca de Mao Tze Tung in Cina? -“
Zente intelligente e de cultura, artistas, iscritores, poetas e musicos, naradenos totu cussu chi pessades”, “ma si non sezis de acordiu cun chie guvernat, tando mudos e musca” (o in presone! Comente faghiat Mao o cantaiat Edoardo Bennato).
Paga est sa fidùtzia aparrada. Sa politica non dat sa libertade, la bogat!
Emmo, pruite finas si bi sunt sos “medios de comunicatzione di massa”, chi ant a servire a ischire cussu chi nos sutzedet in giru in giru, l’ischimus totus chi, chie detzident sunt sempere in pagos e sempere cun informatziones ghiadas e calchi interesse de busciacca!
Sos sardos istant pro su pius mudos, aisettant chi arrivet su mamentu menzus, aisetant calchi promissa chi los cunvinchet de pius, calchi contributu regionale… ma a sa fine non cambiat mai nudda, pruite sunt pagos sos omines liberos chi ant corazu e fortza pro sighire a andare a innanti con s’idea de s’onestade, veridade e onore e cherent deaberu mudare sas cosas.
B’at un’ispera ebia, e minore puru. Chi nois sardos cando andamus a votare pessamus a tota custas cosas e nono a sos iscambios de interessu.
E si non ischimus chie votare pruite non agatamus nisciune chi nos rapresentat, tando non votamus o faghimus votos de protesta a chie si rebellat a custu sistema contra a sa libertade de pessamentu e ideas!
De seguru est difitzile meda, l’ischimus chi b’at crisi e pagu trabagliu, ma pessamus a su tempus bennidore pro sos fizos chi ant a bennere e a sa libertade, individuale e de pòpul, chi no at pretziu !
