In sa cummissione regionale po sa Grafia Unitària, capitant cosas istravanadas. Sa prima est ca is espertos non sunt pagaos. Eja pròpiu de asi. Tenent solu deretu a unu getone de rimborsu po totu is gastos chi faent. Ma custa no iat a èssere sa cosa prus lègia po s'organismu convocau dae su presidete de sa Regione Soru calencunu mese a como. Sa cosa prus de interessu est ca a sos deghe espertos sa Regione ant detzìdiu de non faer peruna cunventzione e perunu cuntratu. Duncas, su traballu in soro no est bidorau in totu. E, mescamente, no est inditau a sa segura si non cun sa famada delibera de incarrigu chi Diariulimba iat giai publicau. Duncas, su naturale de su mandau podet mudare in calesisiat momentu detzidat sa Giunta Regionale. Si, po nàrrere, si detzidit ca una limba-istendardu po sa Regione non bastat prus, e nde serbint duas o tres o milla, sa Regione faet un'àtera delibera e cambiat sa punna. E chie no est amparau de s'oblgatzione giurìdica de unu cuntratu non si podet mancu chesciare. O si fuet, o mudu. Ma, finas a como, s'amore de sa cummissione po su tema prus de importu po sa cale dd'ant cunvocada non s'est galu isboddicau: de sa limba istandard amministrativa regionale si nd'at foeddau pagu e nudda. E pagas sunt is propostas lòmpidas si no cussa de Roberto Bolognesi e de Mario Puddu. Contini non s'est poderau e, i d'una intrevista a unu cuotidianu, at nau ca sa proposta mengius est sa LSU. E at atragagiau su comitau de sa Limba de Mesania nando ca furint "diletantes". Arratza de istile professionale custu catedràticu ! Est in intro chi depet foeddare, non in foras. Meda intamas est s'apretu po sa chirca sotziulimbìstica chi est in su coro de sos catedràticos e in sa cale si cherent faer cunvérghere sos 250 milla euros de istantziamentu postos in bilanciu. Ant aprontau giai unu cuestionàriu cun 70 preguntas...arratza 'e passientzia ant a tènnere is sardos chi depent arrespòndere... De limba si nd'at a foeddare su 24 e su 25 de Cabudanni. A biere...
