28/09/2004 Sa chistione de s'istandard e de s'unidade limbìstica
Sardu: Limba co-ufitziale?
de Taniella Sanna
Sos sardos sunt curiosos abberu. Daghi li toccas sa limba de sa 'idda issoro nenzende chi est menzus a nde fagher una pro su limbatzu amministrativu e s'imparu in sas iscolas, si che pesant dae su sonnu. Si che la leant contra a cussos chi ant fattu custas propostas, proite pessant chi si nche diant devere faeddare puru una limba ebbia, e gherrant tra issos e totu, d'onzunu pro sa variante sua. Ma no cumprendent chi est custas faians sunt fatas pro la salvare, sa limba sarda.
In sos cunvignos inue s'est dada sa paraula a sa zente est essidu a campu su problema de rejonare a subra a cust'argomentu.
Issos no cumprendent proite custa limba amministrativa servit e proite est sa Regione chi la devet faghere. Peroe, proponent, comente alternativa, de faghere cursos de sardu in d'onzi Comune, e in sas iscolas elementare e medias, pro che salvare sa limba chi si ch'est molzende. Pius a prestu, narant, d'onzi bidda cun sa variante sua.
Sas preguntas pius frequentes sunt: "proite custa limba e custas lezes devent colare dae s'altu?", "proite no devimos faeddare pius sa limba nostra?", "pruite sa Regione no si adeguat a totas sas variantes?", "ma no bastat a la faddare ebbia sa limba nostra?", "proite devo impitare paraulas divescias dae sa limba antiga"???
Est naturale chi sa zente de sas biddas si che ponzant custas preguntas. Sa zente chi at sempere faeddadu su sardu at pistighinzu candu s'arrejonat de una polìtica limbistica, giara e pretzisa. Tando tocat a l'argumentare.
Prima de totu tocat a narrere chi sa realidade est divescia sempere dae su chi nos at a piaghere. Difatis, est fatzile meda a narrere chi bastat a lu faeddare su sardu pro l'imparare. Sa chistione est chi sos giovanos e sos pitzinnos no lu faeddant pius. Né in domo né in s'iscola e pagu meda in s'istrada, gioghende. Apo ziradu divescias biddas e iscolas e fiant pagos meda sos pitzinnos chi faeddaiant sa limba sarda in domo, fintzas in cussas biddas chi deo creia cun raighinas pro sa limba pius fortes. Parizos la cumprendent ma no la faeddant. Ite cheret narrere custu? Chi issos no l'ant a insizare mai a sos fizos issoro. Duncas, intro duas zeneratziones su sardu s'at a morrere.
Pro custu est pretzisu s'imparu de sa limba in s'iscola, non faeddada ebbia, ma iscrita puru. E, impari cun sa limba, s'istudiu a subra sos lìbberos iscritos in sardu, de s'istoria de sa Sardigna e de sa cultura nostra.
Si no s'at a fàghere custu, at a essere comente a faeddare s'italianu sende analfabetas chena poder lezere e nemancu iscriere e imparare ateras cosas, antigas, e noas puru, pessende, pro esempiu, a totus cussos romanzos chi sa literadura sarda moderna est boghende a fora. E chi pagu sunt valorizados e publitzizados dae sos mezos de informatzione.
Tando, pro respondere a sas dudas de sa zente, si podet narrere chi pro una 'olta totus sos sardos devent cumprendere chi si devent unire pro no perdere sa limba issoro. B'at una leze nazionale, sa n. 482 de su 1999, chi narat chi sa limba sarda est riconnota comente limba de minoria e pro custu, at sa mantessi dignidade de s'italianu. At bisonzu de essere contivizada e s'Istadu prevedit de impitare risorsas finantziarias publicas pro s'insizu e sa difesa sua. Ma comente si podet fare custu? S'iscola podet, ma comente?
Est sa Regione chi si che devet aggiornare. Difatis sa leze regionale n.26 de su 1997 subra sa limba e sa cultura sarda est 'etza e no prevedit s'òbbligu de su sardu in s'iscola ma solu sa possibilidade de isperimentare, pro sos maistros e professores "chi lu cherent", su manizu de sa limba e de sa cultura sarda. Nudda de pius. Est giaru tando, chi si su sardu divenit limba de insizu ufitziale in s'iscola, sos maistros ant a devere imparare su sardu prima de lu insizare a sos alunnos. Cun custu, si ponet s'atera chistione de cale sardu e cale ortografia e regulas impitare. E tando, si renovat sa risposta a chie preguntat: <proite una limba ebbia?>.
Est importante a aère regulas e una limba sola chi posca in d'onzi bidda siat adatada a sa variante sua, e mezus puru at a essere, a insizare totas sas variantes a su mancu pro conoschentzia a totus sos sardos. Ma sa base devet essere una e una sola. Difatis sos maistros no podent seberare s'iscola de sa biddas inue sunt naschidos pro trabagliare, ma andare inue su Ministeru assignat sa sea ebbia. Pro custu sa base pro tota sa limba devet essere unica.
At a bessire a fora, tando, impari cun sa cussentzia de pòpulu fieru de sa limba sua, sa bellesa de su sardu in totas sas variantes sua. At a essere bellu, una die, allumere sa televisione e intèndere faeddare in sardu, e cumprèndere cale si siat variante dae su nord a su sud de sa Sardigna.
Un'atera chistione est cussa de su limbatzu amministrativu impitadu dae sa Regione, chi at a servire prima 'e totu pro essere de esempru a totu sos Entes publicos e comente conseguentzia pro faghere intendere totus sos sardos comente unu populu pius unidu e forte cun s'identidade sua. In sas amministratziones, comente in italianu puru, est giaru chi s'ant a impitare paraulas e formulas tennicas divescias dae s'italianu chi sa zente normalmente faeddat (limba lezislativa), e custu balet pro sos decretos, deliberas, determinasciones e totus sos documentos publicos.
E tando, pruite pro su sardu, chi est una limba, no si devet faghere su mantessi? Noi sardos devimos pessare a sa limba nostra comente a sas ateras, ne pius nemmancu. Est unu 'isu ebbia? Isperamus de nono.
