|
23/09/2004 Appellu a sas Sardas e a sos Sardos Pro una leze de sa fecondatzione assistida pius zusta e umana de Taniella Sanna In custas dies amus sentidu paritzos apéllos fatos pro una frimma in favore de su referendum pro s’abrogatzione de sa leze 40 aproada calchi mese a como dae custu guvernu. Est beru chi abisonzaiat una leze giara e pretzisa chi deviat regolare sa fecondatzione artifitziale assistida, ma est beru puru chi custa leze no andat bene pro motivos medas. Su primu ‘e totus est chi no est pretzisu a no permittere a una coppia chi lu cheret, e tenet problemas de infertilidade, de no poder àere un fizu disizadu meda, tenende in contu chi sa sientzia andat a innanti pro nos azudare a bìvere su mezus possibile e a nos curare dae sos males nostros. Chie fizos nd’at tentu non si ponet mancu su problema, ma pro chie no est resessidu a n’de àere e lu disizat est una pena manna. Un’atera resone est sa possibilidade, cun sa fecondatzione artifitziale assistida, de poder dare cara e ischirriare, pro sas coppias chi ant problemas de males genèticos, comente sa talassemia (meda diffusa in Sardigna) a sos embriones sanos o malaidos. Pro poder cumprèndere menzus sa chistione tocat a ammentare comente funtzionat sa fecondatzione assistida, e prus a prestu, comente funzionaiat e cumente cun custa leze est mudada. In totus e duos sos casos, sa femina si n’ che devet leare ormones pro poder produire òvulos meda chi su duttore l’at a prelevare e at a fecondare in vitro cun su sèmene de s’òmine. Non totus sos òvulos ant a aère unu resultadu positivu, e solu calchi embrione at a sighire su protzessu e at a andare a giompimentu. Dae custos embriones su dutore at a isseberare su pius forte e cun sa mezus vitalidade, e l’at a ponnere (impiantare) in sa madre (utero) de sa femina. Si totu andat bene s’ingraidentzia (gravidatzia) at a sighire si nono s’at a proare un’atera olta cun unu de cuss’ateros embriones chi su dutore aiat cungeladu innanti, e sa femina no at a aere bisonzu de ateras curas ormonales. Custu fit su protzessu innanti de sa leze noa pro sos casos de infertilitade, comente pro sos casos de males geneticos. Cun sa leze noa, sa numeru 40, sende chi l’ant pubblicada su 19 de su mese de frearzu de ocannu, sa protzedura est divescia in totu. Difatis, sos òvulos, e sos embriones maturados puru, ant a dever essere unu numeru massimu de tres ebbia, chi ant a essere postos totus impari in s’uteru de sa femina. Difatis manc’unu de sos embriones maturados podet essere pius cungeladu. In custa manera si sos embriones sighent sa vida issoro, sa mama at a aère tres fizos totus impari, cun sos problemas de malannos e peleas meda possibiles pro sa vida issoro e de sa femina in sa ingrandantzia e a pustis puru. Un’atera chistione at a essere pro sa coppia chi ischit de poder aère problemas de malannos geneticos comente pro esempiu sa talassemia. Su dutore faghet fecondare sos òvulos (a su massiumu tres) chi, si sighent a bìvere, sunt totus impiantados in sa madre (utero) bonos o malos chi siant cun totas sa conseguentzias chi bi podenet èssere, e ponende puru sa coppia a seberare s’aurtinzu (aborto) pro cussos o cussu malaidos. Difatis, prima de sa leze, su dutore podiat seberare sos embriones sanos, ponendiche intro a sa madre unu ebbia de custos e mancari, s’ateros los podiat cungelare pro un’ateru mamentu, si sa ingraidentzia no fit andada a sa fine. Cun custa leze a cungelare sos embriones est vietadu e su mantessi a seberare s’embrione sanu. No cherzo faeddare de sas ideas de sa Cheja cattolica a intro a custa chistione, apo solu ammentadu in pagas paraulas ite custa leze permitit o no permitit de faghere a d’onzi coppia chi cheret unu fizu e non bi resesset. D’onzunu la pesset cun sa propria cussentzia e libertade, bos iscrio solu una frase chi apo lezidu in unu articulu de sa dozente Claudia Navarini, de sa Facultade de Bioetica de s’Universidade Pontificia Regina Apostolarum faeddende de su desizu de sa femina de aere unu fizu….”…è la mentalità efficientista e materialista per cui la vita del più debole fra i deboli, cioè del bimbo non nato, e sostanzialmente strumentale e subordinata non solo alla vita, ma al benessere del più forte, in questo caso della madre “potenziale”.” Duncas mi paret chi podet essere giaru meda pruite intro a su 28 de capodanni,in d’onzi Comunu, bois podides frimmare pro su referendum abrogativu. Pro sa libertade de iseberu. Taniella Sanna |