28/08/2004 Contos dae Otieri " beffante " e non pius
"chebudda"
Beffanterias
de Cristiano Becciu
Nachi sunt sos inglesos sos chi ant su sensu de s' humour, s'idet chi s'ant ismentigadu sos sardos. Leamus sos otieresos, ca los connosco mezus. Li deviant pònnere Otieri beffante e non "chebudda" comente l'ant postu sas biddas de acultzu. Finas in su faeddu, gai comente ponent sas laras, intórtigant sa 'ucca, si cumprendet luego chi sunt coglionende. Sunt nódidos sos contos de un'otieresu, chi est comente a Pierino in sas barzelletas.
1. Isse, chi fit campagnolu, usaiat de s' apartare cando sa mata tzoccheddaiat. Mai l' esseret mancadu su giornale: si grusciaiat, si falaiat sos caltzones e faghiat su chi deviat fàghere. In su mentras, a su fiagu, acudiant sos carrabusos, a si nde fàghere una mata de su chi s' otieresu nostru fit lassende in terra. Isse, tranchigliu che bodde, si los abbaidaiat cussos carrabusos, nèndelis "apetitu!"
Una die, s' iscussina lu fateit currere lestru lestru a sa maja, chentza mancu li dare su tempus de leare su giornale. Acò sos carrabusos, acudende a manigare, che a semper. S'otieresu si los abbaidat, los saludat, e lis narat : "oe, si non bos batides isterzu.....!"
2. Una die nachi l' aiant cundidu sa sifilide. Sa 'e sa farmacia, chi fit una fémina brava, chi a númene li tocaiat signora Concetta, li rezeteit una pumada chi isse si deviat frigare inue sa sifilide faghet sas piaes chi ischimus. Issa, sa privacy la connoschiat dae chimbanta annos faghet, est pro custu chi cunsizeit a su malaidu de torrare s' incras a farmacia pro bídere sos mezoros, cussizéndeli de non nàrrere nudda de su chi aiat, chi a sa zente no li nd' afutiat nudda. Già l' aiat preguntadu issa, inventéndesi calchi iscuja. S'otieresu, s' incras, che torrat a sa buttega chi fit bàrria 'e zente. Signora Concetta, 'idèndelu , pro non fàghere a cumprendere a sa zente chi s' aiat leadu sa sifilide, li preguntat: "ebbè...e su bratzu?"
Isse, iscabadu comente fit, nachi li rispondeit: "paret a mancu male....non mi dolet....ma...cando píscio mi friet!"
