<Sa zente cheret ditzionàrios e grammàticas sardas>
de Daniela Sanna
Dominiga, su 23 de santu gaini (ottobre), est essidu in Sa Nuova Sardegna, pazina 32, unu’articulu de Letizia Villa titoladu “Tutti in fila per un libro gratis. La Regione ha distribuito a cittadini e biblioteche 6000 opere provenienti dai suoi depositi e acquistati coi soldi pubblici”.
Gai benit a pizu chi 6000 libberos chi fint postos a un’ala in sos magasinos de sa Regione ant fattu sa fine chi deviant faghere. Arrivire a sa zente.
Los aiat comporados sa Regione cun cuntributos de sa leze pro s’editoria e fint abarrados frimmos, fora dae cussu chi fit su fine de sa leze 22, afortigare e tutelare sa cultura nostra.
Eppuru no pare beru chi, in custos annos, sa “propaganda spicciola” meda, no aiat fatu ateru chi murrunzare a subra de custas comperas e sèberos de sa Regione. De seguru non totu sas propostas chi giompent a sos uffitzios de sa cultura sunt bonas de finantziare, ma s’editoria sarda e sa cultura sarda ant bisonzu de agiudu pro si faghere connòschere.
E como, s’assessora de sa cultura e ispetaculu e benes culturales Elisabetta Pilia, at apidu, e giai fit ora, un’idea bona.
A lezere bene cust’articulu si bogat a campu sa cuntentesa e sos parres positivos de sa zente chi in Tatari at apidu sa possibbilidade e sa curiosidade de partetzipare a cust’initziativa culturale itinerante, e chi s’at a frimmare in totu sos capologos de Sardigna.
Enit lestru a conca unu pessamentu.
Sos libberos su pius preguntados e pedidos (“a grande richiesta” amus a narrere in italianu), sunt propriu cussos in sardu.
Grammatica e vocabolarios in sardu pro su pius.
Custu at a depere essere unu sinzale craru pro sa Regione Sardigna e sa politica culturale sua.
Sa zente at famine de cultura sarda, at famine de limba e grammatica sarda. Cheret connoschere menzus sa terra sua, s’archeolozia, s’istoria, sos itinerarios turisticos e culturales.
At bolza de istudiare lezere e de imparare a iscriere su sardu. Totu su sardu.
Isperamus chi poi de sa proposta de sa cummissione regionale pro una limba sarda comuna pro s’impitu de sa limba ufitziale in sas lezes regionales, si passet como a una politica limbistica seria pro totus. Cuncreta e de capia.
Bi nd’at a essere bisonzu, sos sardos sunt aisetende.
