10/10/2005 Poesias

Su poeta sponsorizau 

de Ivo Murgia

Publicau de su Comunu de Meana cun s’agiudu de sa Regioni Sarda





Alloddu in Meana un'àteru prèmiu
curxaus totus a pigai parti
is sabateris e de dònnia arti
is maisteddus cun totu su grèmiu


imoi ge ndi faint apetotu
isciendi ca ddu' at cosa puru
ispirau m'intendu in d-unu botu
provu ancora ndi seu già siguru


no seu a solu no nc’est cuss'arriscu
ca seus in terra de poesia
mi nascit unu versu friscu friscu
deu puru provu a nai sa mia


mi fatzu su contu de is giuraus
ca seu un'espertu partecipanti
m'anti già premiau in tantis e tanti
e medas bortas ddus apu onoraus


ita ant a bolli intendi in dì de oi
e cumenti ddus acuntentu oindì
no seu unu "para fama e corcadì"
pensu: sighi a iscriri e torraddoi


su nòmini connotu e pretziau
cumenti podit èssiri su miu
a moda de un’agiudu torrau

ndi fait unu prèmiu prus nodiu


a chini invècias est unu nueddu
ddi nanta ca no tenit credentziali
ca est unu bincidori potentziali
àteru che poèticu fueddu!


ti serbit una bona connoscèntzia
no de rimas o mètrica sa lei
de prèmiu no ndi bisi, crei a mei 
chi no ti circas sa giusta amighèntzia


chi siat aici crei no dd’ollu

cun sa sàtira a sa sfida m’atrivu

cumenti a cuddu famau sportivu

mancu a solu sa faina dda mollu 



in Meana is contus funti diversus

chen’e “sponsor” t’amitint a sa gara

custa est diaderus una cosa rara

po cussu si presentu custus versus!

A segus