Oi ite lastima, una trasmissione televisiva, in unu canale sardu, de chida passada. Unu esempru de masochismu sardu autucolonialista chi si costumat a fàere in logu nostru.
Si discutiat de Atlantide, mitu e antigòrios: un'ocasione bona po torrare a foeddare de su traballu de Sérighe Frau "Le colonne d'Ercole", in ube sa Sardigna, si no est seguru ca fut Atlantide, a su mancu balangiaiat unu importu mannu in cussa purrata de s'istòria.
E intames? Intames, sos autores ant contau unu muntone de paristorias cun personagios in istùdiu chi furint unu peus de s'àteru, bantando is teorias de Atlantide in s'Antartide, o in is Antillas, o in Messicu, o in aterue. Sa teoria sarda lassada a sa fine e, Frau, mancu cumbidau, petzi intervistau dae foras.
Dd'at depiu nàrrere a su telefono Mario Tozzi (geogolu de su CNR e autore de Gaia, su programma de RAI 3, una persone de gabale, e non unu mustajone bestiu in velliudu) a su cundutore de su programma: <Abbaidae chi a mimme sa teoria de Frau m'at cunvintu cun sos datos, e seus chircando como totu sas provas. Ma si deo fui istau sardu, nd'iat apo a éssere istau orgolliosu de custas propostas, poite a un'istòria mediterranea cun sa Grecia in lughe, iat a sighire un'idea de istòria cun sa Sardigna posta in logu nodiu>.
Ma Tozzi ddu depiat nàrrere? O calencunu ddu depiat cumpréndere a sa sola? Su masochismu culturale e televisivu de una certa genia de sardos est malu a creere de abberu. Ma no est mancu curpa insoro. Provincialismu culturale e cumplessu de inferioridade
Comente cuddos chentu e chentu sovrintedentes, professores, apaltadores e tzeracos insoro chi ant firmau unu documentu contras a Frau proite ponet in conca a sos sardos ideas "eversivas". Beh, si sa Sardigna at contau calencuna cosa in s'istòria sua, arguai a ddu iscoviare a is sardos de como. Tropu perigulosu, tropu eversivu. Méngius a incurbare sémpere sos ogos e sa conca e a non bisare.
Potantis, Atlantide est unu mitu...e sos mitos s'ischit simbulizant su presente de sos pòpulos...
Troia puru fut unu "mitu". Posca dd'ant iscoberta e iscarragiada.
Non biseis, sardos...
S'ameletzu est sèmpere cuddu: un'àteru tsunami podet cugutzare sa vida de dognunu...
