Sinnales de paghe dae chie fut in gherra. S'Unione Sarda at pùbblicau in sa pagine de s'Ogiastra de su 15.11 un'artìculu a subra de un'initziativa de s'Ufitziu de sa Limba Sarda de Nùgoro in collaboratzione cun sa provìncia de Lanusei-Totolì. A su costau de una mustra de libbros, s'est fatu unu cunvénniu presentes Diegu Corraine, Frantzisca Corsi, Zuanne Francu Pintore. Presente su presidente de s'ente intermesanu nou Piero Carta. S'est arresonau meda de unificatzione de su sardu, istandardizatzione e de sa necessidade de lòmpere a una limba comuna chi potzat éssere unu puntu de atòbiu intro campidanesu e logudoresu. Una limba diplomàtica - comente at nau Pintore - chi rapresentet s'unidade de su pòpulu sardu. In s'imperistantu, sa provìncia nugoresa sighit in sa polìtica limbistìca sua. At editau duos libros a subra de sas atividades de custos annos, at torrau a manigiare is triballos de su situ internet informativu in sardu e at cungiau un'acordu cun sa cuestura de Nùgoro po ispainare in sardu novas e informatziones. Dae su cunvénniu de s'Ogiastra lòmpent sinnales de paghe chi faent bene isperare po su benidore unitàriu de sa limba sarda. Isperando chi nemos si pongiant in conca de fraigare "limbas locales artifitziales e unificadas" po cuntrastare su caminu de una limba sarda comuna cun sa cale sos sardos, totu is sardos, si nche potzant bìere rapresentados de abberu.
